امریکہ سے تعلق رکھنے والی کرسٹن فشر، جو کچھ سال قبل بھارت منتقل ہوئیں، نے انسٹاگرام پر ایک دلچسپ ویڈیو شیئر کی۔ اس ویڈیو میں انہوں نے بتایا کہ بھارت میں روزمرہ کی کچھ عادات ایسی ہیں جو امریکیوں کے لیے بے حد عجیب اور غیر آرام دہ ثابت ہو سکتی ہیں۔ انہوں نے آٹھ ایسی عام بھارتی عادات کا ذکر کیا جو امریکی معاشرے میں کم ہی دیکھی جاتی ہیں اور اکثر امریکیوں کے لیے حیران کن ثابت ہوتی ہیں۔
کرسٹن کے مطابق، امریکی ٹوائلٹ پیپر کے عادی ہوتے ہیں اور انہیں جیٹ اسپرے (مسلم شاور کا استعمال نہایت عجیب لگتا ہے۔ ان کے مطابق، "امریکی اس سے گھبرا جاتے ہیں اور بھیگنے کا تصور بھی انہیں ناگوار گزرتا ہے۔" اسی طرح، انہوں نے بھارت میں مشترکہ چپل کے استعمال کو بھی ایک غیر معمولی روایت قرار دیا۔ ان کا کہنا تھا کہ بھارتی گھروں میں اکثر مہمانوں کے لیے 'کمیونل چپل' رکھی جاتی ہے، جو امریکیوں کے لیے بالکل ناقابل قبول ہے کیونکہ وہ ذاتی اشیاء کا اشتراک کرنا ناپسند کرتے ہیں۔
انہوں نے مزید بتایا کہ امریکی عام طور پر اپنی ذاتی پانی کی بوتل رکھتے ہیں اور اسے دوسروں کے ساتھ شیئر کرنا غیر صحتمندانہ سمجھتے ہیں، جبکہ بھارت میں یہ ایک عام روایت ہے۔ اسی طرح، کھانے کے انداز میں بھی نمایاں فرق ہے۔ بھارت میں ایک شخص پورے ٹیبل کے لیے کھانے کا آرڈر دیتا ہے اور سب مل کر کھاتے ہیں، جبکہ امریکا میں ہر فرد اپنا کھانا خود آرڈر کرتا ہے اور دوسروں کے ساتھ شیئر کرنے کا تصور بہت کم پایا جاتا ہے۔
بھارت میں ہاتھ سے کھانے کی روایت بھی امریکیوں کے لیے چونکا دینے والی ہے۔ کرسٹن کے مطابق، "امریکی کھانے کے دوران چمچ، کانٹے اور چاقو کے استعمال کے عادی ہیں، جبکہ ہاتھوں سے کھانے کا تصور انہیں عجیب محسوس ہوتا ہے کیونکہ وہ ہاتھ گندا کرنے سے بچنے کی ہر ممکن کوشش کرتے ہیں۔" اسی طرح، انہوں نے یہ بھی نوٹ کیا کہ بھارت میں اکثر بچے کار میں کسی کے گود میں بیٹھ جاتے ہیں، جبکہ امریکا میں بچوں کو 5-پوائنٹ سیفٹی ہارنس کے بغیر گاڑی میں بٹھانا ناممکن سمجھا جاتا ہے۔
انہوں نے بھارتی ثقافت میں بچوں کے ساتھ سونے کے رواج کو بھی نمایاں کیا اور بتایا کہ امریکا میں والدین عموماً اپنے بچوں کے لیے علیحدہ کمرہ تیار کرتے ہیں، جبکہ بھارت میں اکثر والدین اور بچے ایک ہی کمرے میں سوتے ہیں۔ اسی طرح، شادی کے بعد والدین کے ساتھ رہنے کو بھی امریکیوں کے لیے حیران کن قرار دیا۔ کرسٹن کے مطابق، امریکا میں شادی کے بعد جوڑے عام طور پر الگ گھر میں منتقل ہو جاتے ہیں، جبکہ بھارت میں جوائنٹ فیملی سسٹم عام ہے اور شادی شدہ جوڑے اکثر اپنے سسرال کے ساتھ ہی رہتے ہیں۔
کرسٹن کی ویڈیو نے انسٹاگرام پر 8 لاکھ سے زائد ویوز اور 20 ہزار لائکس حاصل کیے اور ہزاروں تبصرے موصول ہوئے۔ کچھ افراد نے بھارتی روایات کا دفاع کیا، جبکہ کچھ نے ان ثقافتی فرق کو دلچسپ قرار دیا۔ ایک صارف نے لکھا، "بھارت اور امریکا کی اپنی اپنی روایات ہیں۔ بھارت کا خاندانی نظام مضبوط تعلقات کو فروغ دیتا ہے، جبکہ امریکا میں انفرادیت کی اہمیت دی جاتی ہے۔ دونوں کی اپنی خوبیاں ہیں!"