پاکستان میں عالمی مالیاتی ادارے آئی ایم ایف کے نمائندے ماہر بینیجی نے پاکستان کی اقتصادی استحکام کی رفتار کو حوصلہ افزا قرار دیا ہے۔
اے پی پی کے مطابق اسلام آباد میں قائم سسٹین ایبل ڈویلپمنٹ پالیسی انسٹیٹیوٹ میں لیکچر دیتے ہوئے ماہر بینیجی نے کہا کہ سات ارب ڈالر کے قرض پروگرام کے تحت اسلام آباد کی کارکرگی ’اب تک کافی مضبوط‘ ہے۔
انہوں نے اپنے لیکچر میں مشرق وسطیٰ، شمالی افریقہ اور پاکستان میں ابھرتے ہوئے اقتصادی منظرنامے پر بھی روشنی ڈالی۔
انہوں نے 2025 کے دوران اور اس کے بعد بھی ان خطوں میں معاشی ترقی کے مزید مستحکم ہونے کی توقع ظاہر کی۔
تاہم ساتھ انہوں نے یہ بھی کہا کہ تجارتی کشیدگیوں میں اضافے اور اس کے تدارک کے لیے عالمی سطح پر کمزور تعاون غیریقینی کی صورت حال کو بھی بڑھا رہا ہے اس لیے ایسے وقت میں دانش مندانہ پالیسی اپنانے اور دوراندیش قسم کے اقدامات کی ضرورت ہے۔
ان کا یہ بھی کہنا تھا کہ پاکستان کی کارکردگی تاحال بہتر رہی ہے اور ابتدائی طور پر ہونے والے پالیسی اقدامات سے میکرو اکنامک استحکام اور سرمایہ کاروں کے اعتماد کی بحالی میں مدد ملی ہے۔
ماہر بینیجی نے یہ بھی کہا کہ نجی شعبے کی قیادت میں سرمایہ کاری کو فروغ دینے، ٹیکس نظام اور کاروباری ماحول کو بہتر بنانے کی اصلاحات پاکستان کی معاشی پائیداری کے لیے بہت اہمیت کی حامل ہیں۔
انہوں نے ملک کے شعبہ ماحولیات کا حوالہ دیتے ہوئے کہا کہ اس ضمن میں ہونے والی اصلاحات سے نہ صرف پاکستان کا ماحولیاتی نظام بہتر بنے گا بلکہ ان سے گرین انویسٹمنٹ کی راہ بھی ہموار ہو گی۔
پاکستان 2023 کے وسط میں آئی ایم ایف کی جانب سے تین ارب ڈالر کی دی گئی سہولت کی بدولت ڈیفالٹ سے بچ گیا تھا۔ اور پچھلے برس ستمبر میں اہداف کو پورا کرنے کے بعد سات ارب ڈالر کا پروگرام حاصل کیا تھا۔