صوبائی دارالحکومت پنجاب میں بارش کے بعد سڑکوں پر کھڑے پانی پر تنقید کرنے والے بزرگ شہری کی بازیابی کے لیے دائر کردہ درخواست پر عدالت نے رپورٹ طلب کرلی۔
لاہور کی سیشن عدالت میں ساجد نامی بزرگ کے بیٹے عمر نے اپنے والد کی بازیابی کے لیے درخواست دائر کی ہے۔
وکیل کے ذریعے دائر کردہ درخواست میں کہا گیا ہے کہ درخواست گزار کے والد کو ایس ایچ او جوہر ٹائون نے 2 روز سے حبس بے جا میں رکھا ہوا ہے۔
درخواست کے ساتھ مغوی کی پولیس حراست میں لی گئی تصویر بھی لگائی گئی ہے اور دعویٰ کیا گیا ہے کہ پولیس نے تنقید کرنے پر مغوی بزرگ شہری ساجد سے معافی منگوائی اور اس کی ویڈیو بھی پولیس نے جاری کی۔
درخواست گزار نے اپنے گھر میں پولیس کے چھاپے کی سی سی ٹی وی ویڈیو بھی عدالتی ریکارڈ کا حصہ بناتے ہوئے استدعا کی ہے کہ ان کے والد کو پولیس کی غیر قانونی حراست سے بازیاب کروا کر آزاد کیا جائے۔
واضح رہے کہ 10 جولائی کو ایک ویڈیو وائرل ہوئی تھی جس میں ساجد نے لاہور میں شدید بارش کی وجہ سے سڑکوں پر رکنے والے پانی پر وزیر اعلیٰ پنجاب مریم نواز کی کارکردگی پر تنقید کی تھی۔
مذکورہ ویڈیو میں بزرگ شہری ساجد ویڈیو بنانے والے کو ویڈیو لازمی سوشل میڈیا پر اپ لوڈ کرنے کی ہدایت کر رہے تھے، لیکن چند دن بعد ان کی تنقید کی ویڈیو کے ساتھ معافی مانگنے کی ویڈیو ایک بار پھر وائرل ہوگئی ہے۔