خیبر پختونخوا میں حالیہ سیلاب کے باعث لائیو اسٹاک کو شدید نقصان پہنچا ہے محکمہ لائیو اسٹاک نے نقصانات کی ابتدائی رپورٹ جاری کر دی۔
رپورٹ کے مطابق صوبے میں سیلاب کے دوران مجموعی طور پر 1 ارب 57 کروڑ روپے مالیت کے مال مویشی اور چارہ تباہ ہوا۔ سات اضلاع میں مجموعی طور پر 5 ہزار 328 مویشی ہلاک ہوئے۔
محکمہ لائیو اسٹاک کی رپورٹ کے مطابق ہلاک ہونے والے جانوروں میں 1 ہزار 91 بکریاں، 1 ہزار 682 بچھڑے، 1 ہزار 89 گائے، 822 بھینسیں اور 544 بھیڑیں شامل ہیں۔
سیلاب کے باعث پولٹری فارمز بھی شدید متاثر ہوئے۔ صرف بونیر میں 9 ہزار مرغیاں ہلاک ہوئیں جبکہ بونیر، باجوڑ اور سوات میں 4 ہزار 435 گھریلو مرغیاں مر گئیں۔
مزید براں مانسہرہ، شانگلہ، بونیر اور سوات میں جانوروں کے 336 شیلٹرز کو نقصان پہنچا۔ سیلاب کے نتیجے میں 28 کروڑ 60 لاکھ روپے سے زائد مالیت کا چارہ بھی ضائع ہوگیا۔