اسلام آباد : ملک میں ضروری اشیاء کی قیمتوں میں ہفتہ وار بنیادوں پر معمولی کمی جبکہ سالانہ بنیادوں پر اضافہ ریکارڈ کیا گیا ہے۔
ادارہ شماریات پاکستان (پی بی ایس) کی جانب سے ضروری اشیاء کی قیمتوں کے بارے میں حساس اشاریہ (ایس پی آئی) کے مطابق 11 ستمبر کو ختم ہونے والے ہفتہ میں ملک میں صارفین کے لیے قیمتوں کے حساس اشاریہ میں 0.02 فیصد کی کمی اور سالانہ بنیادوں پر 5.03 فیصد اضافہ ہوا ہے۔
ہفتہ کے دوران ملک میں روزمرہ استعمال کی 4 ضروری اشیاء کی قیمتوں میں کمی اور 25 کی قیمتوں میں استحکام رہا اس کے برعکس 22 اشیاء کی قیمتوں میں اضافہ ہوا۔ گزشتہ ہفتہ کے دوران آٹا کی قیمت میں 9.80 فیصد، چکن 3.20 فیصد، کیلا 3.10 فیصد اور گڑ کی قیمت میں 0.30 فیصد کی کمی ہوئی۔
اس کے برعکس پیاز کی قیمت میں 12.17 فیصد، ٹماٹر 10.47 فیصد، آلو 3.57 فیصد، ایل پی جی 3.10 فیصد، اری چاول 1.63 فیصد، انڈے 1.52 فیصد، چینی 1.46 فیصد، دال مونگ 1.33 فیصد، دال ماش 1.28 فیصد، جلانے کی لکڑی 0.24 فیصد، پرنٹڈ لان 0.19 فیصد اور شرٹنگ کی قیمت میں 0.18 فیصد کا اضافہ ہوا،
سب سے کم یعنی 17732 روپے ماہوار آمدنی رکھنے والے گروپ کیلیے قیمتوں کے حساس اشاریہ میں ہفتہ وار بنیادوں پر 0.10 فیصد کی کمی ہوئی، 17733 روپے سے لیکر 22888 روپے، 22889 روپے سے لیکر 29517 روپے، 29518 روپے سے لیکر 44175 روپے ماہوار آمدنی رکھنے والے گروپوں کیلیے قیمتوں کے حساس اشاریہ میں بالترتیب 0.13 فیصد،0.11 فیصد اور 0.09 فیصد کی کمی ہوئی۔
44175 روپے سے زیادہ ماہوار آمدنی رکھنے والے گروپ کیلیے قیمتوں کے حساس اشاریہ میں 0.06 فیصد کا اضافہ ریکارڈ کیا گیا، صارفین کیلیے قیمتوں کے حساس اشاریہ کا تعین ملک کے 17 بڑے شہروں کی 50 مارکیٹوں میں 51 ضروری اشیاء کی قیمتوں میں کمی بیشی کی بنیاد پر کیا جاتا ہے۔