وزیرِ اعلیٰ خیبر پختونخوا کے بھائی فیصل امین گنڈاپور نے اے این پی کے مرکزی صدر ایمل ولی کو ہتک عزت کا نوٹس بھیج دیا۔ فیصل امین گنڈاپور نے عدنان علی ایڈوکیٹ کی وساطت سے ایمل ولی خان کو نوٹس بھجوایا۔
ایمل ولی نے کچھ دن قبل گفتگو میں فیصل امین پر کرپشن کے الزامات لگائے تھے، گفتگو میں الزام لگایا کہ گریڈ 1 سے 21 تک پوسٹنگ ٹرانسفر میں رشوت لیا جارہا ہے، نوٹس میں کہا گیا کہ ایمل ولی خان نے جھوٹے اور بے بنیاد اور سیاسی بدنیتی پر مبنی الزامات لگائے ہیں، فیصل امین سیاسی خاندان سے تعلق رکھتا ہے الزامات سے سیاسی ساکھ کو نقصان پہنچا ہے۔ یہ الزامات صوبائی حکومت کو ناکام بنانے کی کوشش ہے۔
نوٹس میں ایمل ولی کو 14 دن میں فیصل امین گنڈاپور سے غیر مشروط معافی مانگنے کا کہا گیا ہے بصورت دیگر ایک ارب روپے ہرجانے کا دعویٰ دائر کرنے کا عندیہ ظاہر کیا گیا ہے۔