پاک بھارت مقابلہ ایشز سیریز سے زیادہ سنسنی خیز ہوتا ہے، مائیکل وان

بول نیوز  |  Jan 24, 2022

سابق انگلش کپتان مائیکل وان کا کہنا ہے کہ ایشز سیریز سے زیادہ پاکستان اور بھارت کے درمیان ہونے والا مقابلہ سنسنی خیز اور دلچسپی کا باعث ہوتا ہے۔

اسٹار اسپورٹس کو انٹرویو دیتے ہوئے اسٹار بیٹسمین کا کہنا تھا کہ دنیائے کرکٹ میں آسٹریلیا اور انگلینڈ کے مابین ایشز سیریز کو روایتی حریفوں کا مقابلہ سمجھا جاتا ہے تاہم میری رائے مختلف ہے میرے مطابق پاک بھارت مقابلہ اس سے کہیں بڑھ کر ہے۔

پہلی بار روہت شرما کو کسی عالمی ایونٹ میں بھارت کی کپتانی کرتے دیکھنے کا منتظر ہوں، شاید پہلی بار وہ حقیقی دباؤ میں ہوں گے۔

ان کا مزید کہنا تھا کہ ایشز سیریز کے مقابلے گزشتہ کئی سالوں سے یکطرفہ ثابت ہورہے ہیں، جہاں آسٹریلیا نے چھ سال کے دورانیہ میں تیسری بار انگلینڈ کو شکست سے دوچار کیا ہے۔ جبکہ حالیہ سیریز میں انگلش ٹیم کو 4-0 سے شکست کا سامنا کرنا پڑا ہے۔

اس کے برعکس بھارت اور پاکستان صرف انٹرنیشنل کرکٹ کونسل (آئی سی سی) کے زیر اہتمام ہونے والے میگا ٹورنامنٹس میں ایک دوسرے کے خلاف مد مقابل آتے ہیں۔ آخری بار بھارت اور پاکستان کے درمیان آئی سی سی مینز ٹی 20 ورلڈکپ 2021 میں مقابلہ ہوا تھا، جہاں پاکستان نے پہلی بار ورلڈکپ مقابلے میں روایتی حریف کو عبرتناک شکست دوچار کیا تھا۔

علاوہ ازیں سابق جنوبی افریقی پیسر ڈیل اسٹین بھی پاک بھارت مقابلوں کے حوالے سے پرجوش نظر آتے ہیں۔ انہوں نے اسٹار اسپورٹس کو دیئے گئے انٹرویو میں کہا کہ میں دونوں ٹیموں کو ورلڈکپ کے مقابلے میں ایک بار پھر دیکھنا چاہتا ہوں، ‘یہ پاگل کر دینے والا مقابلہ ہوتا ہے’۔

یاد رہے پاک بھارت ٹیمز ٹی ٹوئنٹی ورلڈکپ میں 23 اکتوبر 2022 کو میلبرن کرکٹ گراؤنڈ میں مد مقابل آئیں گی۔

Square Adsence 300X250
مزید خبریں

Disclaimer: Urduwire.com is only the source of Urdu Meta News (type of Google News) and display news on “as it is” based from leading Urdu news web based sources. If you are a general user or webmaster, and want to know how it works? Read More