سینئر اداکار محمود اختر نے انکشاف کیا ہے کہ یورپ میں شوٹنگ کے دوران دل کا دورہ پڑنے پر بھارتی اداکار نوازالدین صدیقی نے ان کی مدد کی، حالانکہ وہ اس پروجیکٹ کا حصہ بھی نہیں تھے۔
پی ٹی وی کے سنہری دور سے اپنے کیرئیر کا آغاز کرنے والے محمود اختر آج بھی اپنی سادہ اور قدرتی اداکاری سے ناظرین کو متاثر کر رہے ہیں۔
حال ہی میں ایک نجی چینل کے شو میں شرکت کے دوران انہوں نے اپنی زندگی کے مختلف پہلوؤں پر کھل کر گفتگو کی۔
محمود اختر نے نہ صرف اپنی والدہ کی دعاؤں اور پیشہ ورانہ لگن کا تذکرہ کیا بلکہ ایک ایسا واقعہ بھی شیئر کیا جس نے سننے والوں کے دلوں کو چھو لیا۔
انہوں نے بتایا کہ ایک بیرونِ ملک شوٹنگ کے دوران انہیں دل کا دورہ پڑا۔ حالات ایسے تھے کہ ان کی ٹیم اگلی لوکیشن کے لیے روانہ ہوگئی، جبکہ وہ تنہا اور بیماری کی حالت میں اسپتال میں داخل تھے۔
دیار ملک میں ان کے پاس کوئی اپنا نہیں تھا۔ اسی دوران ایک بھارتی اداکار، جو اس پراجیکٹ کا حصہ بھی نہیں تھے، ان کے ساتھ رک گئے اور ان کی دن رات دیکھ بھال کی۔
یہ اور کوئی نہیں، بلکہ بالی ووڈ کے مشہور اداکار نوازالدین صدیقی تھے، جنہوں نے 12 دن تک محمود اختر کی تیمارداری کی، یہاں تک کہ ان کے بیٹے وہاں پہنچ گئے۔
محمود اختر نے اس واقعے کو یاد کرتے ہوئے کہا کہ نوازالدین کی یہ مہربانی اور انسان دوستی آج بھی ان کے دل میں نقش ہے۔
انہوں نے کہا کہ نوازالدین کا یہ عمل ثابت کرتا ہے کہ انسانیت اور ہمدردی کی کوئی سرحد نہیں ہوتی۔ ان کا یہ خلوص اور مہربانی آج بھی ان کے دل میں تازہ ہے۔