فواد خان کو ’باڈی ٹرانسفارمیشن‘ کیسے مہنگی پڑی؟

اردو نیوز  |  Sep 25, 2022

فلم اور ٹی وی کے پاکستانی اداکار فواد خان نے کہا ہے کہ فلمی کردار کی مناسبت سے جسم بنانے کی کوشش ان کو بہت مہنگی پڑ گئی تھی اور ہسپتال تک میں داخل ہونا پڑتا تھا۔

انڈین ایکسپریس نے فواد خان کی ایک چیٹ کا حوالہ دیتے ہوئے بتایا ہے کہ کسی دور میں ان پر کرسچیئن بیل اور عامر خان جیسی باڈی بنانے کا بھوت سوار ہوا تھا تاہم وہ کوشش کے باوجود ان جیسی جسامت حاصل نہ کر سکے۔

آج کل اپنی آنے والی فلم ’دی لیجنڈ آف مولا جٹ‘ کی پروموشن میں مصروف فواد خان کا یہ بھی کہنا تھا کہ ’وہ اچھا نہیں تھا، جو میں نے اپنے ساتھ کیا کیونکہ اس نے مجھ پر منفی اثر ڈالا اور آئندہ کبھی ایسا نہیں کروں گا۔‘

’اے دل ہے مشکل‘ اور ’کپور اینڈ سنز‘ سمیت متعدد ہندی فلموں میں کام کرنے والے فواد خان نے جسم کو نئے انداز میں ڈھالنے کی خواہش کے منفی پہلو پر بات کرتے ہوئے کہا کہ لوگوں کو معلوم ہونا چاہیے کہ اس سے ان کی صحت کو نقصان بھی ہو سکتا ہے۔

’میرے ساتھ بھی ایسا ہوا، گردوں نے کام چھوڑ دیا تھا اور دس روز ہسپتال میں داخل رہنا پڑا۔‘

انہوں نے بتایا کہ اگرچہ ہسپتال میں چند ہی روز گزارے تاہم مکمل طور پر صحت یاب ہونے میں انہیں تین ماہ کا عرصہ لگا۔

فواد خان نے کرسچیئن بیل کی طرح باڈی بنانے کی کوشش کی تھی (فوٹو: ای ڈبلیو ڈاٹ کام)انہوں نے یہ بھی بتایا کہ تب سے وہ ذیابیطس کے مرض میں مبتلا ہیں جس نے ان کی صحت پر بہت برا اثر ڈالا ہے۔

انہوں نے بتایا کہ فلم  کے لیے وزن بڑھانے سے قبل ان کا وزن 73 سے 75 کلوگرام تھا تاہم کردار کے لیے اس کو 100 کلوگرام تک بڑھانا۔

انہوں نے اپنے اقدام کو غلطی قرار دیتے ہوئے کہا کہ ’میں اس پر گھنٹوں صرف کرتا رہا کیونکہ میرے پاس وقت کم تھا تاہم یہ درست طریقہ نہیں تھا۔ میں کرسچیئن بیل نہیں ہوں مگر وہی کرنے کی کوشش کی جو وہ کرتے ہیں جبکہ عامر خان کی طرح بننے کی کوشش بھی کی۔

فواد خان نے سب کو یاد دلایا کہ جسم میں اس قسم کی تبدیلیاں راتوں رات نہیں آتیں۔

’میں جسم میں ایسی تبدیلیوں کے لیے کبھی کسی حوصلہ افزائی نہیں کروں گا۔‘

اداکار آخری بار ماروِل سیریز مس ماروِل میں نظر آئے تھے۔

مزید خبریں

Disclaimer: Urduwire.com is only the source of Urdu Meta News (type of Google News) and display news on “as it is” based from leading Urdu news web based sources. If you are a general user or webmaster, and want to know how it works? Read More