مینارِ پاکستان ہراسیت کیس، خاتون ٹک ٹاکر عائشہ اکرم کے وارنٹ جاری

اردو نیوز  |  Dec 09, 2022

مینار پاکستان پر ٹک ٹاکر خاتون سے بدسلوکی کے مقدمے میں اہم پیش رفت ہوئی ہے جہاں لاہور کی سیشن کورٹ نے عائشہ اکرم کے ناقابل ضمانت وارنٹ گرفتاری جاری کیے ہیں۔

جمعے کو ایڈیشنل سیشن جج نے گزشتہ سماعت کا تحریری حکم جاری کرتے ہوئے لکھا کہ بطور گواہ پیش نہ ہونے پر ٹک ٹاکر عائشہ اکرم کے وارنٹ گرفتاری جاری کیے جاتے ہیں۔

عدالت نے متعلقہ ایس ایچ او کو خاتون سمیت دیگر گواہوں کو گرفتار کر کے پیش کرنے کا حکم دیا ہے۔

تحریری حکم نامے کے مطابق عدالت نے مقدمے کی مدعیہ سمیت دیگر گواہوں کو طلب کیا تھا۔ ’عدالتی احکامات کو مدعیہ سمیت کسی گواہ نے اہمیت نہیں دی۔‘

عدالت نے سماعت 5 جنوری تک ملتوی کر دی۔

تھانہ لاری اڈا پولیس نے ٹک ٹاکر عائشہ اکرم کی مدعیت میں ہراساں کیے جانے کے خلاف مقدمہ درج کر رکھا ہے۔

خاتون ٹک ٹاکر عائشہ اکرم کو ہجوم کی جانب سے ہراساں کیے جانے کا واقعہ گزشتہ سال اگست میں ہوا تھا جس پر سوشل میڈیا صارفین نے سخت ردعمل ظاہر کیا تھا۔ 

سوشل میڈیا پر جب ویڈیوز وائرل ہوئیں تب وزیراعظم اور وزیراعلیٰ پنجاب نے نوٹس لیا تھا اور اس معاملے کی اعلیٰ سطحی تحقیقات کا حکم دیا گیا تھا۔

مزید خبریں

Disclaimer: Urduwire.com is only the source of Urdu Meta News (type of Google News) and display news on “as it is” based from leading Urdu news web based sources. If you are a general user or webmaster, and want to know how it works? Read More