ایرانی سرحد کے پار سے دہشت گردوں کا حملہ، چار اہلکار جان سے گئے

اردو نیوز  |  Apr 01, 2023

پاکستانی فوج کے شعبہ تعلقات عامہ آئی ایس پی آر کے مطابق بلوچستان سے متصل ایرانی سرحد کے پار سے دہشت گردوں کے ایک حملے میں چار فوجی اہلکاروں کی جان چلی گئی۔

سنیچر کو آئی ایس پی آر کی جانب سے جاری کردہ بیان میں بتایا گیا کہ ’پاکستان ایران سرحد کے ضلع کیچ کے جالگئی سیکٹر میں معمول کی گشت کے دوران ’دہشت گردوں کے ایک گروہ نے سرحد پار سے حملہ کیا۔‘

’حملے میں نائیک شیر محمد، لانس نائیک محمد اصغر، سپاہی عرفان اور سپاہی عبدالرشید شدید زخمی ہوگئے اور بعد میں جان کی بازی ہار گئے۔‘

بیان کے مطابق اس حوالے سے  دہشت گردوں کے خلاف موثر کارروائی کے لیے ایرانی حکام کے ساتھ رابطہ کیا گیا تاکہ مستقبل میں اس نوعیت کے واقعات کی روک تھام کی جا سکے۔

خیال رہے کہ رواں سال جنوری میں بھی بلوچستان کے ضلع پنجگور میں ایرانی سرزمین سے پاکستانی سکیورٹی فورس پر حملہ کیا گیا تھا جس میں چار پاکستانی فوجی جان گنوا بیٹھے تھے۔

ایران کے علاقے سے پاکستانی فوجی اہلکاروں پر ہونے والے گذشتہ حملے کے بعد بھی پاکستان کے دفتر خارجہ نے ایرانی حکام سے دہشت گردوں کے خلاف کارروائی کرنے کا مطالبہ کیا تھا اور ایرانی سفیر کو طلب کر کے تشویش کا اظہار کیا تھا۔

اس موقعے پر دفتر خارجہ کی جانب سے ایک احتجاجی مراسلہ بھی ایرانی سفیر کے حوالے کیا گیا تھا جس میں پاکستان کی جانب سے دہشت گردی کے واقعے کی مذمت کے ساتھ ایران سے مطالبہ کیا گیا کہ وہ اپنی سرزمین پاکستان کے خلاف استعمال ہونے سے روکے۔

مزید خبریں

Disclaimer: Urduwire.com is only the source of Urdu Meta News (type of Google News) and display news on “as it is” based from leading Urdu news web based sources. If you are a general user or webmaster, and want to know how it works? Read More