لاہور: انٹرنیشنل کرکٹ کونسل (آئی سی سی) چیمپئنز ٹرافی کی افتتاحی تقریب لاہور میں کرانے کا فیصلہ کر لیا گیا۔
ذرائع کے مطابق آئی سی سی چیمپئنز ٹرافی کی افتتاحی تقریب لاہور میں کرانے کا فیصلہ کیا گیا ہے۔ جو 16 فروری کو منعقد کی جائے گی۔ تقریب کا انعقاد حضوری باغ لاہور میں کیا جائے گا۔
آئی سی سی چیمپئنز ٹرافی کا افتتاحی میچ 19 فروری کو کراچی میں شیڈول ہے۔ اور یہ میچز ٹین اسپورٹس پر براہ راست نشر کیے جائیں گے۔
ذرائع کے مطابق پاکستان کرکٹ بورڈ (پی سی بی) نے چیمپئنز ٹرافی کی افتتاحی تقریبات کا شیڈول تیار کر لیا ہے۔ اور چیئرمین پی سی بی محسن نقوی نے تمام تقریبات کی حتمی منظوری بھی دے دی ہے۔
قذافی اسٹیڈیم لاہور میں جاری تعمیراتی کام بھی تکمیل کے قریب ہے۔ اور قذافی اسٹیڈیم کی افتتاحی تقریب 7 فروری کو کیے جانے کا امکان ہے۔ وزیر اعظم شہباز شریف قذافی اسٹیڈیم کی افتتاحی تقریب میں مہمان خصوصی ہوں گے۔
یہ بھی پڑھیں: چیمپئنز ٹرافی،آن لائن ٹکٹوں کی فروخت میں مزید 10 فیصد اضافہ کردیا گیا
ذرائع کے مطابق چیئرمین پی سی بی محسن نقوی نے وزیر اعظم شہباز شریف کو دعوت دے دی ہے۔ اور اسٹیڈیم کی افتتاحی تقریب میں لیزر شو بھی کیے جانے کا امکان ہے۔
ذرائع کے مطابق پی سی بی نے نیشنل اسٹیڈیم کراچی کی نئی بلڈنگ کا افتتاح کرنے کا بھی فیصلہ کر لیا۔ نیشنل اسٹیڈیم کراچی کی افتتاحی تقریب 11 فروری کو ہو گی۔ اور صدر آصف علی زرداری کی بطور مہمان خصوصی تقریب میں شرکت متوقع ہے۔