پاکستان کرکٹ بورڈ (پی سی بی) کے چیئرمین محسن نقوی نے کہا ہے کہ آئی سی سی چیمپئنز ٹرافی کے پاکستان میں انعقاد کے لیے تمام تیاریاں مکمل ہیں۔
محسن نقوی نے بدھ کو راولپنڈی کرکٹ سٹیڈیم کا دورہ کیا جہاں انہوں نے سٹیڈیم کی اپ گریڈیشن اور تیاریوں کا جائزہ لیا۔
محسن نقوی نے پنڈی کرکٹ سٹیڈیم کے پویلین، میڈیا باکس، وی آئی پی باکسز سمیت سٹیڈیم کے مختلف حصوں کا معائنہ کیا۔
چیئرمین پی سی بی نے سٹیڈیم کے فنشنگ ورک کا بھی مشاہدہ کیا۔
میگا ایونٹ کے لیے سٹیڈیم کی اپ گریڈیشن پراجیکٹ پر محسن نقوی نے اطمینان کا اظہار کیا۔
میڈیا سے بات کرتے ہوئے محسن نقوی نے کہا کہ ’راولپنڈی کرکٹ سٹیڈیم کی تزئین و آرائش کا کام آخری مراحل میں داخل ہو چکا ہے۔ مین پویلین اور میڈیا باکس کی تزئین و آرائش کا کام مکمل پو چکا ہے۔‘
انہوں نے مزید کہا کہ ’کرسیوں کی تنصیب آخری مراحل میں ہے جسے چند روز میں مکمل کر لیا جائے گا۔‘
چیئرمین پی سی بی کا مزید کہنا تھا کہ ’طویل عرصے کے بعد پاکستان میں آئی سی سی ٹورنامنٹ کا انعقاد ہو رہا ہے۔ میگا ایونٹ کے شاندار انعقاد کے لیے تمام تیاریاں مکمل ہیں۔‘
محسن نقوی نے مزید کہا کہ ’چیمپئنز ٹرافی ایونٹ کو یادگار بنائیں گے اور امید ہے کہ شائقین کرکٹ کو بہترین کرکٹ دیکھنے کو ملے گی۔‘
خیال رہے کہ آئی سی سی چیمپئنز ٹرافی کا آغاز 19 فروری سے ہو رہا ہے۔
ایونٹ کے پہلے میچ میں میزبان پاکستان کا مقابلہ نیوزی لینڈ سے کراچی میں ہوگا۔
چیمپئنز ٹرافی کے میچز پاکستان کے تین شہروں لاہور، کراچی اور راولپنڈی سمیت یو اے ای کے شہر دبئی میں کھیلے جائیں گے۔