پاکستانی بحریہ کے زیرِاہتمام کثیرالقومی مشق امن 2025 شمالی بحیرہ عرب میں انٹرنیشنل فلیٹ ریویو کے شاندار انعقاد کے ساتھ اختتام پذیر ہو گئی ہے۔پاکستانی فوج کے شعبہ تعلقات عامہ (آئی ایس پی آر) کی جانب سے منگل کو جاری ہونے والے بیان کے مطابق امن مشق 2025 میں سعودی عرب اور متحدہ عرب امارات سمیت تقریباً 60 ممالک نے اپنے بحری جنگی جہازوں، ایئر کرافٹ، میرینز، سپیشل آپریشن فورسز اور بڑی تعداد میں مبصرین کے ساتھ حصہ لیا۔بیان کے مطابق انٹرنیشنل فلیٹ ریویو میں پاکستانی بحریہ اور غیرملکی بحری جنگی جہازوں کی جانب سے امن فارمیشن کا شاندار مظاہرہ کیا گیا۔ جبکہ چیف آف آرمی سٹاف جنرل عاصم منیر اس موقع پر مہمان خصوصی تھے۔
یہ مشق ’امن کے لیے متحد‘ نصب العین کے تحت پاکستان کی امن اور باہمی تعاون پر مبنی سلامتی کے لیے غیرمتزلزل حمایت کی عکاسی کرتی ہے۔
آرمی چیف کی پاکستانی بحریہ کے جہاز ’معاون‘ آمد پر چیف آف دی نیول سٹاف ایڈمرل نوید اشرف نے ان کا استقبال کیا۔ اس موقع پر گورنر سندھ، وزیراعلٰی سندھ اور وفاقی وزیر برائے بحری امور بھی موجود تھے۔بحری مشق میں شریک ممالک کے سفیروں، ہائی کمشنرز، غیرملکی بحری افواج کے سربراہان، سینیئر فوجی افسران، دفاعی اور نیول اتاشی بھی اس تقریب میں شریک تھے۔مہمان خصوصی جنرل عاصم منیر نے انٹرنیشنل فلیٹ ریویو کے دوران مختلف آپریشنل مشقوں کا مظاہرہ دیکھا۔ فلیٹ ریویو میں پاکستان نیوی، پاکستان ایئر فورس اور شریک غیرملکی طیاروں کا شاندار فلائی پاسٹ بھی پیش کیا گیا۔فلائی پاسٹ کے بعد مشق میں حصہ لینے والے بحری جہازوں کی جانب سے مین اینڈ چیئر شپ کا مظاہرہ کیا گیا۔ مشق کا اختتام روایتی امن فارمیشن کی تشکیل کے ساتھ ہوا جو بحری تحفظ کے لیے اجتماعی عزم کی علامت ہے۔مہمان خصوصی جنرل عاصم منیر نے انٹرنیشنل فلیٹ ریویو کے دوران مختلف آپریشنل مشقوں کا مظاہرہ دیکھا۔ (فوٹو: آئی ایس پی آر)بیان کے مطابق چیف آف آرمی سٹاف جنرل عاصم منیر نے امن 2025 کی کامیاب میزبانی پر پاکستانی بحریہ کو مبارک باد دی اور امن کے فروغ کے لیے پاکستان کے عزم کو سراہا۔انہوں نے میری ٹائم سکیورٹی میں تعاون کے عزم کا اظہار کرنے پر شریک علاقائی و عالمی بحری افواج کا شکریہ ادا کیا۔آرمی چیف نے اس بات پر زور دیا کہ امن 2025 ایک ایسا فورم بن کر سامنے آیا ہے جس نے تمام عالمی جغرافیائی طاقتوں کو ’محفوظ سمندر، خوشحال مستقبل‘ کے مشترکہ مقصد کے تحت جمع کیا۔ جس کی عملی عکاسی دنیا بھر سے بحری افواج کی اس مشق میں بھرپور شرکت ہے۔