اسلام آباد: ملک کے مختلف حصوں میں آج بھی بارش اور پہاڑوں پر برفباری کا امکان ہے۔
محکمہ موسمیات کے مطابق ملک کے بیشتر علاقوں میں موسم سرد اور خشک رہے گا۔ تاہم گلگت بلتستان میں چند مقامات پر بارش و برفباری کا امکان ہے۔
آزاد کشمیر کے چند مقامات پر ہلکی بارش و برفباری کا امکان ہے جبکہ چترال کے بھی چند مقامات پر بارش اور برفباری ہو سکتی ہے۔
وفاقی دارالحکومت، بلوچستان، پنجاب اور سندھ کے بیشتر اضلاع میں بھی سردی کی شدت برقرار رہے گی۔
گزشتہ روز اسلام آباد، راولپنڈی، مری سمیت ملک کے مختلف حصوں میں ہلکی بارش اور پہاڑوں پر برفباری ہوئی۔ جس کے باعث سردی کی شدت میں اضافہ ہو گیا۔ سب سے زیادہ بارش خیبر پختونخوا کے علاقے دیر میں 15 ملی میٹر ریکارڈ کی گئی۔ کالام میں 12، بالاکوٹ میں 06، مالم جبہ میں 04، چترال میں ایک ملی میٹر بارش ہوئی۔ پنجاب کے علاقے مری میں 03، اسلام آباد میں ایک ملی میٹر بارش ریکارڈ کی گئی۔
یہ بھی پڑھیں: تمام ہائیکورٹس کے ججز کی تعیناتی میں یہ ممبران ساتھ ساتھ تھے، بیرسٹرعقیل ملک
گلگت بلتستان کے علاقے استور میں 02، بگروٹ میں ایک ملی میٹر بارش ہوئی۔ کالام میں 05 انچ اور استور میں 02 انچ برفباری ہوئی۔
گزشتہ روز کم سے کم درجہ حرارت لہہ میں منفی 07 ڈگری سینٹی گریڈ ریکارڈ کیا گیا۔ جبکہ پارا چنار میں منفی 04، بگروٹ میں منفی 03، مالم جبکہ اور زیارت میں منفی 02 ڈگری سینٹی گریڈ ریکارڈ کیا گیا۔