آئی سی سی چیمپئنز ٹرافی کے دسویں میچ میں افغانستان نے آسٹریلیا کو جیتنے کے لیے 274 رنز کا ہدف دے دیا ہے۔
لاہور میں جاری میچ میں ٹاس جیت کر پہلے بیٹنگ کرتے ہوئے افغانستان نے مقررہ 50 اوورز میں 10 وکٹوں کے نقصان پر 273 رنز بنائے۔
افغانستان کی جانب سے صدیق اللہ اتل 85 رنز بنا کر نمایاں رہے جبکہ عظمت اللہ عمرزئی نے 67 اور ابراہیم زدران نے 22 رنز بنائے۔
آسٹریلیا کی جانب سے بین ڈیوارشیس نے تین جبکہ ایڈم زیمپا اور سپینسر جانسن نے دو دو کھلاڑیوں کو آؤٹ کیا۔
چیمپئنز ٹرافی کے سیمی فائنل میں پہنچنے کے لیے یہ میچ دونوں ٹیموں کے لیے جیتنا بہت ضروری ہے۔
ایونٹ میں افغانستان کی ٹیم اب تک دو میچ کھیل چکی ہے جن میں وہ ایک میچ جیتی ہے جبکہ ایک میچ ہاری ہے۔
اُدھر آسٹریلوی ٹیم بھی آج ایونٹ میں اپنا آخری میچ کھیل رہی ہے۔
آسٹریلیا نے اس سے قبل روایتی حریف انگلینڈ کو شکست دی تھی جبکہ راولپنڈی میں جنوبی افریقہ کے خلاف اُن کا میچ بارش کی نذر ہو گیا تھا۔
آسٹریلیا اور افغانستان ون ڈے کرکٹ میں چار مرتبہ آمنے سامنے آئی ہیں جن میں چاروں میچز آسٹریلیا نے جیتے ہیں۔
دونوں ٹیموں نے ون ڈے ورلڈ کپس میں ایک دوسرے سے کُل تین میچز کھیلے ہیں جبکہ چیمپئنز ٹرافی میں یہ پہلا ٹاکرا ہوگا۔
پچھلے دو برسوں میں آسٹریلیا اور افغانستان دو مرتبہ انٹرنیشنل میچز میں آمنے سامنے آئے ہیں۔
سنہ 2023 میں انڈیا میں کھیلے گئے ون ڈے ورلڈ کپ کے دوران آسٹریلیا اور افغانستان کے میچ نے دونوں ٹیموں کے درمیان سنسنی کی بنیاد اُس وقت رکھی جب گلین میکسویل نے تن تنہا اپنی ٹیم کو ہارا ہوا میچ جتوا دیا۔
7 نومبر 2023 کو ممبئی کے وانکھیڈے سٹیڈیم میں آسٹریلیا نے 291 رنز کا ہدف گلین میکسویل کی تاریخی 201 رنز کی اننگز سے اپنے نام کر لیا۔
اس کے بعد اگلے برس 22 جون 2024 کو سینٹ ونسینٹ میں کھیلے گئے آئی سی سی ٹی20 ورلڈ کپ کے میچ میں افغانستان نے ون ڈے ورلڈ کپ کا بدلہ لیتے ہوئے آسٹریلیا کو 21 رنز سے ہرا دیا تھا۔
دونوں ٹیموں کے درمیان سنسنی کی بنیاد اُس وقت رکھی جب گلین میکسویل نے تن تنہا اپنی ٹیم کو ہارا ہوا میچ جتوا دیا۔ (فوٹو: اے ایف پی)
آسٹریلوی ٹیم 149 رنز کا ہدف حاصل کرتے ہوئے 127 رنز پر ڈھیر ہوگئی تھی۔
اس کے علاؤہ آسٹریلیا اور افغانستان کے کرکٹ بورڈز کے درمیان سیاسی گرما گرمی بھی پائی جاتی ہے۔
افغانستان میں طالبان حکومت کی خواتین کرکٹ ٹیم کے حوالے سے پالیسیوں کے باعث آسٹریلیا نے افغانستان سے باہمی کرکٹ سیریز کھیلنے سے انکار کیا ہوا ہے۔
افغانستان اور آسٹریلیا کے درمیان اب تک چار ون ڈے میچز کھیلے جا چکے ہیں جس میں چاروں مرتبہ آسٹریلیا نے فتح حاصل کی۔