اسلام آباد: وزیر اعظم شہباز شریف نے کہا ہے کہ دہائیوں کی خرابیوں کو ہمیں مل کر ٹھیک کرنا ہے۔
وزیر اعظم شہباز شریف کی زیر صدارت فیڈرل بورڈ آف ریونیو (ایف بی آر) کی کارکردگی پر اجلاس ہوا۔ وزیراعظم نے 34.5 ارب روپے کی ریکوری پر متعلقہ وزرا اور افسران کی پذیرائی کرتے ہوئے مستقل نظام کی تشکیل کے لیے لائحہ عمل طلب کر لیا۔
شہباز شریف نے کہا کہ فیصلے کے بعد 24 گھنٹوں کے اندر ریکوری قابل ستائش اقدام ہے۔ اور ایسے بہترین نتائج ظاہر کرتے ہیں کہ محنت و لگن سچی ہو تو کامیابی ضرور ملتی ہے۔ یہ تاریخی کام آپ جیسی محنتی ٹیم کے ساتھ ہی ممکن تھا۔
انہوں نے کہا کہ 34.5 ارب کی ریکوری ایک اچھی شروعات ہے لیکن ابھی ہمارا سفر شروع ہوا ہے۔ ہمیں مستقل بنیادوں پر ایک پائیدار نظام تشکیل دینا ہے اور دہائیوں کی خرابیوں کو ہمیں مل کر ٹھیک کرنا ہے۔
یہ بھی پڑھیں: وزیر اعلیٰ پنجاب کیطرف سے اسپیشل بچوں کیلئے اسپیشل عیدی
وزیر اعظم نے ہدایت کی کہ ایف بی آر کی ریکوریوں کے حوالے سے مستقل بنیادوں پر مربوط قانونی ڈھانچہ تشکیل دیا جائے۔ جبکہ اصلاحات و ٹیکس قوانین پر عملدرآمد کو یقینی بنانے کے لیے بھی لائحہ عمل تشکیل دے کر پیش کیا جائے۔
انہوں نے مزید کہا کہ ایف بی آر کی افرادی قوت کی بہتری کے لیے ایک پلان تشکیل دیا جائے۔ 100 فیصد ڈیجیٹائزیشن، تھرڈ پارٹی ویلیڈیشن اور مسلسل نگرانی سے ہی نظام میں بہتری آئے گی۔ جبکہ کسی بھی قسم کی خردبرد میں ملوث افسران اور اہلکاروں کے خلاف کارروائی کی جائے۔
شہباز شریف نے مزید کہا کہ اچھی کارکردگی والے افسران و اہلکاروں کی ستائش یقینی بنائی جائے۔ ہمیں پاکستان کی تقدیر کو بدلنا ہے تو نظام میں مستقل بنیادوں پر تبدیلی نا گزیر ہے۔ اور عوام کی ایک ایک پائی کی حفاظت کے لیے جس قدر ہوسکا کوشش کریں گے۔