دلجیت دوسانجھ اور ہانیہ عامر کی فلم ’سردار جی تھری‘ نے انڈیا میں ریلیز نہ ہونے کے باوجود ایک ارب 80 کروڑ روپے سے زائد کا کاروبار کر لیا ہے۔
امار ہندل کی ہدایت کاری میں بننے والی فلم ’سردار جی تھری‘ 27 جون کو ریلیز ہوئی تھی، تاہم یہ فلم ٹریلر کی لانچ کے ساتھ ہی تنازعات کا شکار رہی ہے۔
تنازعے کی وجہ فلم میں پاکستانی اداکارہ ہانیہ عامر کی موجودگی تھی۔
رواں برس 22 اپریل کو پہلگام میں سیاحوں پر حملے کے بعد انڈیا اور پاکستان کے درمیان کشیدگی کی وجہ سے پاکستانی فنکاروں کے انڈیا میں کام کرنے پر پابندی عائد کر دی گئی تھی۔ اس کے بعد ’سردار جی تھری‘ کی انڈیا میں ریلیز روک دی گئی تھی۔
تمام تنازعات کے باوجود ’سردار جی تھری‘ بین الاقوامی سطح پر زبردست بزنس کر رہی ہے۔
شوبز کی ویب سائٹ ’کوئی موئی‘ کے مطابق فلم نے بیرونِ ملک خاص طور پر پاکستان اور کینیڈا میں دُھوم مچا رکھی ہے اور ریلیز کے تیسرے ہفتے کے اختتام پر اس کی مجموعی باکس آفس کلیکشن 55 کروڑ انڈین روپے سے تجاوز کر گئی ہے جو پاکستانی کرنسی میں ایک ارب 80 کروڑ روپے سے زائد رقم بنتی ہے۔
چند دن قبل دلجیت دوسانجھ کی ٹیم نے انسٹاگرام پر ایک پوسٹ شیئر کی تھی جس میں فلم کی بین الاقوامی مقبولیت کی جانب اشارہ کیا گیا تھا۔ پوسٹ میں دعویٰ کیا گیا تھا کہ فلم نے صرف دو ہفتوں میں 52 کروڑ انڈین روپے کا بزنس کر لیا ہے۔
دلجیت دوسانجھ نے اس تنازعے پر بی بی سی ایشیئن نیٹ ورک کو دیے گئے ایک انٹرویو میں ردِعمل دیتے ہوئے کہا تھا کہ ’جب یہ فلم بنائی جا رہی تھی، تب سب کچھ ٹھیک تھا، ہم نے فروری میں شوٹنگ کی اور اس وقت حالات معمول پر تھے پھر اچانک بڑے واقعات ہوئے جو ہمارے اختیار سے باہر تھے۔‘
انہوں نے مزید بتایا کہ ’پروڈیوسرز نے فیصلہ کیا کہ اب یہ فلم انڈیا میں ریلیز نہیں ہوگی، اس لیے اسے صرف بیرونِ ملک ریلیز کیا جائے گا۔ انہوں نے اس فلم پر بہت سرمایہ لگایا ہے اور جب یہ بن رہی تھی، تب کوئی تنازع نہیں تھا۔‘
دلجیت دوسانجھ کا کہنا تھا کہ ’انہیں (پروڈیوسرز کو) اندازہ تھا کہ انڈیا میں ریلیز نہ ہونے سے نقصان ہوگا، کیونکہ ایک پوری مارکیٹ باہر ہو جاتی ہے۔ جب میں نے فلم سائن کی، تب سب کچھ نارمل تھا۔ اب حالات ہمارے ہاتھ میں نہیں ہیں، اگر پروڈیوسرز بیرونِ ملک ریلیز کرنا چاہتے ہیں تو میں ان کے ساتھ ہوں۔‘
فلم ساز کبیر خان جن کی فلم ’بجرنگی بھائی جان‘ 17 جولائی کو ریلیز کے 10 سال مکمل کر رہی ہے، نے بھی دلجیت دوسانجھ کی حمایت کی ہے۔
کبیر خان نے کہا کہ ’دلجیت کو نشانہ بنانا ناانصافی ہے۔‘
یاد رہے کہ بجرنگی بھائی جان میں بھی انڈیا اور پاکستان کے درمیان کشیدگی کو ایک پاکستانی بچی مُنی کی کہانی کے ذریعے مثبت انداز میں پیش کیا گیا تھا جسے ایک انڈین شہری بجرنگی وطن واپس پہنچاتا ہے۔