شہر قائد میں کئی ہفتوں کی خوشگوار فضا کے بعد گرمی نے ایک بار پھر زور پکڑ لیا ہے۔ تیز دھوپ اور صاف مطلع کے باعث درجہ حرارت میں بتدریج اضافہ ہورہا ہے۔
محکمہ موسمیات کے مطابق آئندہ تین روز کے دوران کراچی کا موسم گرم اور مرطوب رہنے کا امکان ہے جب کہ شہر کا زیادہ سے زیادہ درجہ حرارت 36 ڈگری سینٹی گریڈ تک پہنچ سکتا ہے۔ کم سے کم درجہ حرارت 27 سے 28 ڈگری کے درمیان رہنے کی پیش گوئی کی گئی ہے۔
محکمہ موسمیات کے مطابق دن کے پہلے پہر شمال مغربی ہوائیں چلیں گی جو بعد ازاں سمندر سے آنے والی جنوب مغربی ہواؤں میں تبدیل ہوجائیں گی۔ صبح کے وقت نمی کا تناسب 90 فیصد اور شام کے وقت 65 فیصد تک ریکارڈ ہونے کا امکان ہے جس کے باعث گرمی کی شدت مزید بڑھ سکتی ہے۔
صوبہ سندھ کے بیشتر علاقوں میں بھی آئندہ دنوں کے دوران موسم گرم اور مرطوب رہنے کا امکان ہے تاہم بارش کے آثار موجود نہیں ہیں۔