ملک میں توانائی کے شعبے سے بڑی خوشخبری سامنے آئی ہے سندھ کے ضلع خیرپور میں تیل اور گیس کے نئے ذخائر دریافت ہوئے ہیں۔
ترجمان آئل اینڈ گیس ڈیولپمنٹ کمپنی لمیٹڈ (او جی ڈی سی ایل) کے مطابق خیرپور کے بترسم ایسٹ-1 ایکسپلورٹری کنویں سے یومیہ 2 کروڑ 25 لاکھ مکعب فٹ (22.5 ایم ایم ایس سی ایف ڈی) گیس اور 690 بیرل خام تیل حاصل ہوگا۔
ترجمان نے بتایا کہ کنویں کی کھدائی 30 جون 2025 کو شروع کی گئی تھی جسے 3 ہزار 800 میٹر کی گہرائی تک کھودا گیا۔ کھدائی کے بعد ڈرل اسٹیم ٹیسٹ بھی کامیابی سے مکمل ہوئے۔
او جی ڈی سی ایل کے مطابق یہ اہم دریافت ملکی ہائیڈروکاربن ریزروز میں اضافہ کرے گی توانائی کی طلب اور رسد کے فرق کو کم کرنے میں مددگار ثابت ہوگی اور درآمدی بل میں بھی خاطر خواہ کمی لائے گی۔