اپنے کھیل سے زیادہ منفی رویئے کی وجہ سے مشہور بنگلہ دیشی آل راؤنڈر شکیب الحسن ورلڈکپ میں ٹائم آؤٹ تنازعہ کے بعد الیکشن کے دوران بھی اپنی بدتمیزی اور برے رویئے سے باز نہ رہ سکے اور ایک شہری کوتھپڑ مار کر نیا جھگڑا مول لے لیا۔
یہ پہلا موقع نہیں جب بنگلادیشی کھلاڑی اپنے غصے پر قابو نہ رکھ سکے بلکہ اس سے قبل کھیل کے میدان میں بھی کئی بار اپنے غصے کے باعث تنازعات و پابندی کا شکار ہوچکے ہیں۔
بھارت میں ہونیوالے ورلڈ کپ کے دوران انہوں نے سری لنکا کے بلے باز اینجیلو میتھیوس کو ”ٹائم آؤٹ “ کرنے کی اپیل کرکے پوری دنیا میں موجود کرکٹ شائقین کو شدید مایوس کیا تھا۔یہ واقعہ بین الاقوامی کرکٹ کی 146 سالہ تاریخ میں پہلا واقعہ تھا جب کسی بالر نے امپائر سے ” ٹائم آؤٹ “ کی اپیل کی تھی۔
گزشتہ دنوں شکیب الحسن نے عوامی لیگ کی جانب سے عام انتخابات میں ماگورا حلقے 1 سے انتخابات میں حصہ لیا اور بھاری اکثریت سے جیت بھی گئے۔انتخابات سے قبل انہوں نے مختلف سیاسی جلسے جلوس میں شرکت کی۔
بنگلہ دیشی آل راؤنڈر نے انتخابی مہم کے دوران اپنے سیاسی عزائم سے لوگوں کو آگاہ کیا، ملک کے مختلف حصوں میں سیاسی مہم کے دوران جلسے جلوسوں میں کرکٹ کھیلتے بھی نظر آئے۔
گزشتہ روز پولنگ کی صورتحال کا جائزہ لینے کے لیے ایک پولنگ اسٹیشن کا رخ کیا تو مداحوں کی بڑی تعداد امڈ آئی، اس دوران مداحوں نے انہیں تصویر بنانے کے لیے گھیر لیا، جس پر شکیب الحسن آگ بگولہ ہوگئے اور تصویر بنوانے کی درخواست کرتے شہری کو تھپڑ مار دیا۔شکیب الحسن کے اس شرمناک رویئے پر کرکٹ شائقین نے شدید ردعمل کا اظہار کیا ہے۔