سڈنی میں آسٹریلیا کے خلاف تیسرے اور آخری ٹیسٹ میچ میں شکست کے بعد پاکستان کرکٹ ٹیم کے فاسٹ باؤلر حسن علی تماشائی پر غصہ ہوگئے، ویڈیو وائرل ہونے کے بعد شائقین کرکٹ نے حسن علی پر تنقید شروع کردی۔
پاکستان 1995 سے اب تک آسٹریلیا کے خلاف ہوم گراؤنڈ میں ٹیسٹ میچ جیتنے سے قاصر ہے جبکہ حالیہ سیریز میں بھی آسٹریلیا نے پاکستان کو سڈنی ٹیسٹ میں 8 وکٹ سے شکست دے کر سیریز میں 3-0 سے وائٹ واش کیا ۔اس سے پہلے آسٹریلیا نے پاکستان کو میلبرن ٹیسٹ اور پرتھ ٹیسٹ میں میں بھی شکست دی تھی۔
سڈنی میں تیسرے ٹیسٹ میچ میں شکست کے بعد جب شائقین کرکٹ فاسٹ باؤلر حسن علی سے آٹوگراف لے رہے تھے تو اس دوران ایک تماشائی نے حسن علی پر کوئی فقرہ کس دیا ۔ ویڈیو میں سنا گیا کہ تماشائی کہتا ہے کہ حسن یہاں آؤ تمہیں کیچ پکڑنا سِکھاؤں۔
حسن علی تماشائی نے تماشائی کے جملے پر غصے میں جواب دیتے ہوئے کہا کہ ضرور، آجاؤ ادھر، یہاں آؤ، کون سکھائے گا مجھے کیسے کیچ پکڑنا ہے؟۔
واضح رہے کہ فاسٹ باؤلر نسیم شاہ کے انجرڈ ہونے کی وجہ سے حسن علی کو طویل عرصہ بعد ٹیسٹ ٹیم میں شامل کیا گیا تھا تاہم وہ کوئی اہم کارکردگی دکھانے سے قاصر رہے جبکہ میلبرن ٹیسٹ میں فیلڈنگ کے دوران تماشائیوں کو محظوظ ضرور کیا۔
ویڈیو وائرل ہونے کے بعد سوشل میڈیا صارفین نے حسن علی پر شدید تنقید کرتے ہوئے کہا کہ گراؤنڈ میں کچھ ہوتا نہیں ، سارا غصہ تماشائیوں پر نکالنے سے بہتر ہے کہ گھر جائیں اور کسی اور کو موقع دیں۔