کیا دنیا کا سب سے پتلا آئی فون لانچ ہونے والا ہے؟ جانیں اس کے ممکنہ فیچرز اور پاکستانی قیمت کے بارے میں دلچسپ معلومات

امریکی ٹیکنالوجی کی دنیا میں ایپل ایک بار پھر سبقت لے جانے کی تیاری میں ہے۔ رپورٹس کے مطابق، کمپنی ایک ایسا اسمارٹ فون لانچ کرنے جا رہی ہے جس کا دعویٰ ہے کہ یہ دنیا کا سب سے پتلا اسمارٹ فون ہو گا، جسے ’آئی فون 17 ایئر‘ کے نام سے پیش کیا جائے گا۔

تجزیہ کار جیف پیو کی تحقیقاتی رپورٹ کے مطابق، اس ’ایئر‘ ورژن کی خاص بات اس کی محض 6 ملی میٹر موٹائی ہو گی۔ اگر یہ ڈیزائن حقیقت کا روپ دھارتا ہے تو یہ آئی فون 16 کے مقابلے میں نمایاں طور پر زیادہ پتلا ہو گا، حتیٰ کہ پہلے کے سب سے پتلے آئی فون 6 کی 6.9 ملی میٹر موٹائی کو بھی پیچھے چھوڑ دے گا۔

اب تک آئی فون 17 ایئر کی مکمل تفصیلات منظرِ عام پر نہیں آئی ہیں، مگر اس کے بارے میں کہا جا رہا ہے کہ یہ 6.6 انچ ڈسپلے، ایلومینیم چیسس، ایپل انٹیلی جنس سپورٹ کے ساتھ A19 ایس او سی چپ، 8GB ریم، 48 میگا پکسل سنگل بیک کیمرہ، فیس آئی ڈی کے ساتھ 24 میگا پکسل کا فرنٹ کیمرہ اور ایپل کا 5G موڈیم کے ساتھ آئے گا۔

دلچسپ بات یہ ہے کہ ایپل کے علاوہ جنوبی کورین کمپنی سام سنگ بھی میدان میں ہے، اور خبروں کے مطابق وہ ’گلیکسی S25‘ کے نام سے دنیا کا سب سے پتلا اسمارٹ فون متعارف کرانے والی ہے، جس کی موٹائی محض 5.6 ملی میٹر ہو گی۔

ایپل کے آئی فون 17 ایئر کی قیمت کے حوالے سے تجزیہ کاروں کا کہنا ہے کہ یہ تقریباً $1,299 (امریکی ڈالر) سے شروع ہونے کی توقع ہے۔ اگر اسے پاکستانی روپے میں تبدیل کیا جائے تو یہ قیمت تقریباً 4,00,000 روپے کے لگ بھگ ہو سکتی ہے، مگر کرنسی ریٹ اور ٹیکسز کی بنیاد پر اس میں تبدیلی بھی ممکن ہے۔