پاکستان کے مقبول اداکار شہریار منور کی شادی کی تقریبات کا باقاعدہ آغاز ہوگیا ہے، اور سوشل میڈیا پر ان کی ڈھولکی کی جھلکیاں مداحوں کی توجہ کا مرکز بنی ہوئی ہیں۔
انسٹاگرام پر وائرل ہونے والی ویڈیو میں شہریار منور کو ماہین صدیقی کے ساتھ بیٹھے موسیقی انجوائے کرتے دیکھا جا سکتا ہے۔ شہریار نے براؤن رنگ کا نفیس کرتا زیب تن کیا جبکہ ماہین صدیقی نے پیلے رنگ کے سوٹ کے ساتھ بالوں میں گجرے پہن کر اپنی سادگی اور خوبصورتی سے سب کو متاثر کیا۔
چند روز قبل وائرل انٹرویو میں شہریار نے اپنی شادی کی تصدیق کرتے ہوئے کہا تھا کہ وہ رواں ماہ زندگی کے نئے سفر کا آغاز کرنے والے ہیں۔ جب صحافی نے ان کی ہونے والی اہلیہ کے بارے میں سوال کیا تو شہریار نے واضح الفاظ میں کہا، "جی بالکل نہیں، ان کا تعلق شوبز سے نہیں ہے۔"
یہ پہلا موقع نہیں جب ماہین صدیقی کا نام شہریار کے ساتھ جوڑا جا رہا ہے۔ اس سے پہلے، اپنی سالگرہ کے موقع پر، شہریار نے ماہین کے لیے "جان" کا لفظ استعمال کیا تھا، جس کے بعد مداحوں نے قیاس آرائیاں شروع کردی تھیں۔ اب ڈھولکی کی یہ جھلکیاں ان خبروں کو مزید تقویت دے رہی ہیں۔
شہریار کی ڈھولکی کی ویڈیو سوشل میڈیا پر خوب وائرل ہورہی ہے، اور مداحوں کو ان کی شادی کی مزید تقریبات اور دلہن کی پہلی جھلک کا بےصبری سے انتظار ہے۔
شہریار منور کی شادی کی یہ خوشیاں شوبز انڈسٹری میں ایک خوبصورت اضافہ ہیں۔ مداح اداکار کے لیے نیک تمناؤں کا اظہار کر رہے ہیں اور ان کے نئے سفر کے لیے دعاگو ہیں۔