’مودی جی ٹک ٹاک سے پابندی ہٹائیں ورنہ میں پاکستان جا رہی ہوں‘ راکھی ساونت کی دھمکی

انڈین اداکارہ راکھی ساونت نے وزیراعظم نریندر مودی سے ویڈیو سٹریمنگ ایپ ٹک ٹاک پر عائد پابندی ہٹانے کا مطالبہ کیا ہے۔ راکھی ساونت نے انسٹاگرام پر اپنی رِیل میں مطالبہ کیا کہ انڈیا میں ٹک ٹاک پر لگی پابندی ہٹائی جائے ورنہ وہ پاکستان چلی جائیں گی۔

انہوں نے مزید یہ بھی کہا کہ پوری دنیا ٹک ٹاک سے پیسہ کما رہی ہے اور وہ دبئی میں ٹک ٹاک سے پیسہ کماتی ہیں لیکن انہیں دبئی نہیں رہنا، وہ انڈیا رہنا چاہتی ہیں۔

راکھی ساونت نے مزید کہا کہ اگر ٹک ٹاک پر پابندی نہ ہٹی تو وہ پاکستان چلی جائیں گی اور کسی پاکستانی سے شادی کر لیں گی۔

دوسری جانب راکھی ساونت نے پاکستانی اداکارہ ہانیہ عامر کو ڈانس کے مقابلے کا چیلنج دے دیا۔

ہندوستان ٹائمز کے مطابق پاکستان کے نجی ٹی وی کو دیے گئے اپنے حالیہ انٹرویو میں راکھی ساونت نے ہانیہ عامر سمیت سٹیج اداکاراؤں دیدار اور نرگس کو بھی ڈانس کا چیلنج دیا۔

راکھی ساونت جو خود ’بالی وڈ کی نمبر ون آئٹم گرل‘ اور ’ریئلٹی ٹی وی کی ملکہ‘ کہتی ہیں انہوں نے چیلنج کیا کہ وہ ہانیہ عامر، دیدار اور نرگس کے ساتھ مقابلے میں اپنی ڈانسنگ پاور دکھائیں گی۔

راکھی ساوت نے کہا کہ ’میں اُن سب کو ہرا دوں گی۔ میں ریئلٹی ٹی وی کی سب سے بڑی کوئن ہوں۔ میں تہس نہس کرتی ہوں اور میں تہس نہس کروں گی۔ میں انہیں بہت سخت مقابلہ دوں گی۔‘

اس چیلنج کے بعد ہانیہ عامر نے بھی فارم انسٹاگرام پر اپنا جواب دے دیا۔

ہانیہ عامر نے انسٹاگرام پر رِیل پوسٹ کی جس میں آڈیو آواز راکھی ساونت کی تھی۔

اِس رِیل میں وہ راکھی ساونت کی نقل اتارتی ہیں اور کیپشن میں لکھتی ہیں کہ ’راکھی جی ایک شاہکار ہیں۔‘ 

خیال رہے کہ ہانیہ عامر کو گزشتہ سال ریلیز ہونے والے ڈرامے کبھی میں کبھی تم سے پاکستان سمیت دنیا بھر غیر معمولی شہرت ہوئی۔

اس ڈرامے کی بلاک بسٹر کامیابی کے بعد انڈیا میں ہانیہ عامر ایک بڑا فین  بیس بنانے میں کامیاب ہوئیں۔

ہانیہ عامر عشقیہ، میرے ہم سفر اور مجھے پیار ہوا تھا جیسے بڑے ڈراموں میں بھی کام کر چکی ہیں۔