ترکیہ کے صدر رجب طیب اردوغان کی وزیراعظم ہاؤس آمد پر وزیراعظم شہباز شریف نے ان کا استقبال کیا اور مسلح افواج کے دستوں نے انہیں گارڈ آف آنر پیش کیا جبکہ فضائیہ کے طیاروں نے فلائی پاسٹ کیا۔
وزیراعظم ہاؤس میں منعقد تقریب میں دونوں ممالک کے درمیان متعدد مفاہمتی یادداشتوں اور معاہدوں پر دستخط ہوئے۔
اس سے قبل ترک صدر نے وزیراعظم ہاؤس کے احاطے میں درخت لگایا۔
وزیراعظم ہاؤس کی جانب سے جاری بیان میں کہا گیا ہے کہ وزیراعظم شہباز شریف اور ترکی کے صدر طیب اردوغان دو طرفہ ملاقات کے بعد دونوں رہنما اعلٰی سطح کی سٹریٹیجک کونسل کے اجلاس میں اپنے اپنے وفود کی قیادت بھی کریں گے۔
ترکیہ کے صدر رجب طیب اردوغان بدھ اور جمعرات کی درمیانی رات دو روزہ سرکاری دورے پر اسلام آباد پہنچے ہیں۔
اسلام آباد پہنچنے پر ترک صدر کے استقبال کے لیے وزیراعظم شہباز شریف اور صدر مملکت آصف علی زرداری ایئرپورٹ پر موجود تھے۔پاکستان کے دفتر خارجہ کی جانب سے جاری بیان کے مطابق صدر اردوغان پاکستان ترکیہ ہائی لیول سٹریٹجک تعاون کونسل کے اجلاس کی وزیراعظم شہباز شریف کے ساتھ مشترکہ سربراہی کریں گے جس کا فوکس دوطرفہ تجارت، سرمایہ کاری اور دوسرے ترجیحی سیکٹرز ہوں گے۔ ’پاکستان، ترکیہ ہائی لیول کواپریشن کونسل‘ کا قیام 2009 عمل میں لایا گیا تھا۔
اس کونسل کے تحت کئی مشترکہ قائمہ کمیٹیاں اہم سکیٹرز بشمول تجارت، سرمایہ کاری، بینکنگ، فنانس، ثقافت، سیاحت، توانائی، دفاع، زراعت اور دیگر شعبوں میں دوطرفہ تعاون کی نگرانی کرتے ہیں۔
کونسل کے قیام کے بعد سے اب تک اس کے چھ سیشن ہوچکے ہیں۔ کونسل کا آخری اجلاس 2020 میں اسلام آباد میں منعقد ہوا تھا۔دفتر خارجہ کے مطابق سیشن کے اختتام پر مشترکہ اعلامیہ جاری کیا جائے گا۔بیان میں کہا گیا ہے کہ صدر اردوغان صدر زرداری سے ملاقات کریں گے اور پاکستان ترکیہ بزنس اینڈ انوسٹمنٹ فورم سے بھی خطاب کریں گے۔