Getty Images
جو بازی آسٹریلیا نے قسمت کے بل پر کمائی تھی، وہ ہنر کی امتحان گاہ میں کوتاہی کی نذر ہو گئی۔ ایک اور آئی سی سی ٹرافی اپنی الماری میں سجانے کی حسرتِ ناکام لیے کینگروز کو وراٹ کوہلی نے ٹائٹل کی دوڑ سے ہی باہر کر دیا۔
سٹیو سمتھ کو ادراک تھا کہ جس سیمی فائنل تک رسائی وسائل کی بجائے محض قسمت کے مرہون منت رہی تھی، وہاں جیت کے لیے ان کا بنیادی انحصار بھی اپنے بلے بازوں پر ہی رہنا تھا کہ بولنگ ذخائر تو تجربے سے محروم تھے۔
جہاں بیٹنگ میں مچل مارش کی عدم دستیابی کے باوجود آسٹریلیا کو ٹریوس ہیڈ، سٹیو سمتھ، مارنس لبوشین، جاش انگلس، ایلیکس کیری اور گلین میکسویل جیسے مستند نام میسر تھے، وہیں بولنگ اٹیک تجربے کی سند سے عاری تھا۔
سو، یہاں پہلے بیٹنگ کا فیصلہ بجا تھا کہ میچ کے اوائل میں ہی اپنی کمزوری عیاں کرنے کے بجائے پہلے سکور بورڈ کے اعداد سے بولرز کی ناتجربہ کاری کو کچھ تقویت دی جاتی اور پھر بولنگ ڈسپلن سے مضبوط انڈین مڈل آرڈر پر دباؤ کی کوئی ترکیب سجھائی جاتی۔
مگر روہت شرما، شبھمن گل، ورات کوہلی، شریاس ائیّر، کے ایل راہول، ہاردک پانڈیا اور رویندرا جڈیجہ جیسے گھاگ ناموں پر محیط بیٹنگ آرڈر کو جو ہندسہ دباؤ میں لا پاتا، وہ آسٹریلوی بلے بازوں کی پہنچ سے دور رہ گیا۔
Getty Images
انڈین سکواڈ میں ٹیلنٹ کی گہرائی ایسی ہے کہ صرف دو باقاعدہ سپنرز کی موجودگی میں بھی یہ سپن کے 40 بہترین اوورز پیدا کر سکتا ہے جبکہ مسابقت کا معیار بھی ایسا ہے کہ مشّاق بلے بازوں کے ہاتھ بھی کھلنے نہ پائیں۔
یہاں ٹریوس ہیڈ کی ابتدائی یلغار نے سٹیو سمتھ کو وہ پلیٹ فارم مہیا کر دیا تھا جہاں سے وہ اننگز کو طول دے پاتے اور سپن کے خلاف اپنی مہارت سے انڈین عزائم کو بھی قابو میں رکھ سکتے۔
مچل مارش کی غیرموجودگی جہاں اس ٹاپ آرڈر کی کمزوری ہے، وہیں پیٹ کمنز کے بغیر اس بیٹنگ لائن کی گہرائی بھی کم پڑ جاتی ہے کہ لوئر آرڈر کے ساتھ ’اینکر‘ کا کردار نبھانے کو کوئی نہیں رہتا۔
گو میچ کے تناظر میں سمتھ کی یہ اننگز اپنے سٹرائیک ریٹ کے باوجود آسٹریلوی امکانات کو بہت مفید تھی مگر روہت شرما کی حاضر دماغی نے عین درست لمحے پر ان کا امتحان سپن کی بجائے پیس سے لینے کا فیصلہ کیا۔
جو سمت آسٹریلوی اننگز کو اپنے کپتان کے ہمراہ دکھائی دے رہی تھی، ان کی وکٹ گنواتے ہی اپنی راہ کھو بیٹھی اور اپنے ہدف سے پیچھے گر جانا اس کا مقدر ٹھہرا۔
Getty Images
اگرچہ ایلیکس کیری کی اننگز نے اس کی ڈوبتی نبض کو خوب سنبھالا دیا لیکن انڈین فیلڈنگ پر بداعتمادی صرف انھیں ہی نہیں، بالآخر آسٹریلوی ٹیم کو بھی بہت مہنگی پڑی۔ ان کی وکٹ نے متوقع آسٹریلوی مجموعے کو مزید 20 رنز کے خسارے میں ڈال دیا۔
چیمپیئنز ٹرافی میں انڈیا ناقابلِ تسخیر، فائنل دبئی میں: ’آسٹریلیا سے ورلڈ کپ کا انتقام لے لیا‘چیمپیئنز ٹرافی کے سیمی فائنل: دبئی کا غیر معمولی سفری پلان اور انڈیا کا ’ہوم ایڈوانٹج‘وکرانت گپتا: ’لاہور میں توقع سے زیادہ پیار ملا، یہاں آ کر پتا چلا پاکستانی وراٹ اور بمرا کو کتنا پسند کرتے ہیں‘سعید انور: بولرز کے لیے ’ڈراؤنا خواب‘ بننے والے اوپنر جو عمران خان کی طرح کرکٹ کی دنیا چھوڑنا چاہتے تھے
حالیہ ٹورنامنٹ میں دبئی کی پچز کا جو رجحان رہا ہے، اس کے تحت متوقع یہی تھا کہ آخری پاور پلے میں پرانی گیند کے ٹرن اور ریورس سوئنگ کے خلاف رنز کا حصول دشوار رہے گا۔ اپنے بولنگ اٹیک کی ناتجربہ کاری کے ملحوظ تو آسٹریلیا کو یہاں مسابقتی مجموعے سے بھی 20 رنز اوپر درکار تھے۔
Getty Imagesگو میچ کے تناظر میں سمتھ کی یہ اننگز اپنے سٹرائیک ریٹ کے باوجود آسٹریلوی امکانات کو بہت مفید تھی مگر روہت شرما کی حاضر دماغی نے عین درست لمحے پر ان کا امتحان سپن کی بجائے پیس سے لینے کا فیصلہ کیا
تو پھر ایسے متوسط مجموعے کے دفاع کی قوت کہاں سے آتی کہ مہارت کا جو معیار محمد شامی، کلدیپ یادیو، اکسر پٹیل اور ورون چکرورتی کے یہاں دکھائی دیا، اس کا مقابلہ اکیلے ایڈم زیمپا بھلا کیسے کر پاتے جنھیں نہ تو مچل سٹارک کی تائید حاصل تھی اور نہ ہی پیٹ کمنز یا ہیزل ووڈ کا آسرا؟
اپنی تمام تر ناتجربہ کاری اور کم مائیگی کے باوجود آسٹریلوی بولنگ پھر بھی قابلِ رشک رہی کہ آخر تک میچ کو باندھے رکھا۔ مگر سٹیو سمتھ کی بھروسہ مند قیادت بھی بالآخر وراٹ کوہلی کے سامنے بے بس ٹھہری۔
انڈیا اس فائنل تک رسائی کا بجا حق دار تھا اور ٹورنامنٹ جیتنے کو جو وسائل اسے دستیاب ہیں، فائنل میں اس کا مقابلہ خواہ کیویز سے ہو، خواہ پروٹیز سے، ٹائٹل کے لیے فیورٹ روہت شرما کی ٹیم ہی ہو گی۔
چیمپیئنز ٹرافی میں انڈیا ناقابلِ تسخیر، فائنل دبئی میں: ’آسٹریلیا سے ورلڈ کپ کا انتقام لے لیا‘چیمپیئنز ٹرافی کے سیمی فائنل: دبئی کا غیر معمولی سفری پلان اور انڈیا کا ’ہوم ایڈوانٹج‘’میڈیا پر جنگ، میدان میں ٹھنڈ‘: ماضی میں سنسنی سے بھرپور پاکستان انڈیا کا میچ جو اب ٹکر کا مقابلہ نہیں رہایہ پاکستان کرکٹ بورڈ ہے یا کوئی فرنچائز کمپنی؟چیمپیئنز ٹرافی 2017: وہ میٹنگ جس نے پاکستان کے لیے ٹورنامنٹ کا رخ موڑ دیا’دی گریٹسٹ رائیولری‘: انڈیا اور پاکستان کے کرکٹرز پر سیاست، توقعات اور شائقین کے دباؤ کی کہانی