چینی مزید مہنگی ، پھلوں کی قیمت میں بھی اضافہ ہو گیا

کراچی اور اسلام آباد میں چینی مزید مہنگی ہو گئی، چینی کی فی کلو قیمت میں 15 سے 20 روپے کا اضافہ ہوگیا۔

کراچی میں چینی کی ریٹیل قیمت 15 سے 20 روپے بڑھا دی گئی ہے، ریٹیل مارکیٹ میں چینی 165 سے 170 روپے فی کلو تک فروخت ہورہی ہے۔

کراچی میں رمضان سے قبل چینی فی کلو 130 سے 140 روپے میں دستیاب تھی، چینی کے 50 کلو کے تھیلے کی قیمت 7870 روپے تک پہنچ گئی ہے۔

دکانداروں کا کہنا تھا کہ رمضان المبارک سے قبل 50 کلو چینی کا تھیلا 6100 روپے میں مل رہا تھا اس کی قیمت میں 1770 روپے کا مزید اضافہ ہوگیا ہے۔

چینی کی قیمت میں 10 روپے تک اضافہ ہو گیا

اسلام آباد میں بھی چینی مزید مہنگی ہو گئی ہے، عام دکانوں پر فی کلو چینی کی قیمت 175 روپے وصول کی جا رہی ہے۔ لاہور میں بھی چینی دس سے پندرہ روپے مہنگی فروخت کی جا رہی ہے۔

ملک کے دیگر شہروں کی طرح حیدر آباد میں بھی پھلوں کی قیمتوں میں اضافہ ہو گیا ہے، فی درجن کیلے کی قیمت 150 سے بڑھ کر 250 روپے تک جا پہنچی ہے، مالٹے اور امرود کی قیمتوں میں بھی اضافہ ہواہے جس کے بعد وہ 250 روپے کلو تک پہنچ گئے ہیں۔

سیب مارکیٹ میں فی کلو 280 روپے میں فروخت ہورہا ہے، تربوز کی فی کلو قیمت بھی 200 روپے تک پہنچ گئی ہے۔