الیکشن کمیشن نے سپریم کورٹ سے اوورسیز پاکستانیوں کو ووٹ کا حق دینے کے لیے دائر درخواستیں خارج کرنےکی استدعا کر دی۔
الیکشن کمیشن نے تحریری جواب میں کہا ہے کہ درخواستوں میں الیکشن ایکٹ میں ترمیم چیلنج کی گئی ہے، الیکشن کمیشن آئی ووٹنگ کا پائلٹ پروجیکٹ اکتوبر 2018 کے ضمنی انتخاب میں کرچکا، پائلٹ پروجیکٹ کی رپورٹ منظوری کے لیے پارلیمنٹ کو پیش کی جاچکی ہے۔
الیکشن کمیشن کا کہنا تھا کہ سپریم کورٹ کے حکم پر پائلٹ پراجیکٹ کا تھرڈ پارٹی آڈٹ بھی کروایا گیا، تھرڈ پارٹی آڈٹ رپورٹ کے مطابق آئی ووٹنگ محفوظ ہے نہ ووٹ کی رازداری قائم رہ سکتی ہے، پارلیمان کا استحقاق ہے کہ اوورسیز کی ووٹنگ کے لیےکیا طریقہ اپناتی ہے، پارلیمان کی صوابدید ہے اوورسیز کے لیے نشستیں مختص کرے یا پوسٹل بیلٹ۔
الیکشن کمیشن کی جانب سے یہ بھی کہا گیا کہ پارلیمان چاہے تو اوورسیز پاکستانیوں کے لیے سفارت خانوں میں ووٹنگ کا قانون بھی بناسکتی ہے، الیکشن ترمیمی ایکٹ کے خلاف دائر درخواستیں خارج کی جائیں۔
واضح رہےکہ بانی پی ٹی آئی، شیخ رشید اور وکیل داؤد غزنوی نے اوورسیز کو ووٹ کا حق نہ دینے سے متعلق ترمیم چیلنج کر رکھی ہے۔