بھارت کے سابق کپتان اور کمنٹیٹر سنیل گواسکر پاکستان کی جانب سےمیچ سے قبل پریس کانفرنس منسوخ کرنے پرغصے سے تلملا گئے۔ گواسکر نے انٹرنیشنل کرکٹ کونسل سے مطالبہ کیا ہے کہ وہ ایشیا کپ میں پیش آنے والے واقعات پر پاکستان کرکٹ ٹیم اور پاکستان کرکٹ بورڈ کے خلاف سخت کارروائی کرے۔
ایک انٹرویو میں سنیل گواسکر نے پاکستان ٹیم مینجمنٹ اور بورڈ پر الزام لگایا کہ انہوں نے آئی سی سی قوانین کی خلاف ورزی کی اور ناٹک رچایا۔ ان کا کہنا تھا کہ پاکستان ٹیم نے یو اے ای کے خلاف میچ جان بوجھ کر ایک گھنٹہ تاخیر سے شروع کروا کر ایونٹ اور کرکٹ کی ساکھ کو نقصان پہنچایا۔
سابق بھارتی کپتان نے یہ الزام بھی لگایا کہ پاکستان ٹیم مینجمنٹ نے دو بار میچ کے بعد کی پریس کانفرنسز کو نظر انداز کیا اور بھارتی ٹیم کے کھلاڑیوں سے ہاتھ نہ ملانے پر غیر ضروری تنازع کھڑا کیا جبکہ دو دو ٹیموں کے درمیان ہاتھ ملانا لازمی نہیں ہوتا۔
واضح رہے کہ آئی سی سی کے قوانین کے مطابق میچ سے پہلے یا بعد میں کسی ٹیم کو اپنے نمائندے کو بھیجنا لازمی نہیں اور اگر وہ پریس کانفرنس نہیں کرتے تو اس پر کوئی فائن نہیں۔ آئی سی سی کے مطابق جس طرح ہاتھ ملانا لازمی نہیں اسی طرح پریس کانفرنسز کرنا بھی لازمی نہیں۔