قومی کرکٹ ٹیم کے آل راؤنڈر حسین طلعت نے سری لنکا کے خلاف شاندار آل راؤنڈ پرفارمنس کے بعد کہا ہے کہ پاکستان ٹیم ایشیا کپ جیتنے کی پوری صلاحیت رکھتی ہے اور بھارت کو سخت مقابلہ دینے کے لیے تیار ہے۔
سری لنکا کے خلاف میچ میں حسین طلعت نے شاندار اننگز کھیلنے کے ساتھ ساتھ دو اہم وکٹیں بھی حاصل کیں اور پاکستان کی فتح میں مرکزی کردار ادا کیا۔ پریس کانفرنس میں گفتگو کرتے ہوئے انہوں نے کہا کہ پاکستان کے مڈل آرڈر میں بیٹنگ کرنا سب سے مشکل ذمہ داری ہے کیونکہ بیٹسمین کو تینوں فارمیٹس جیسی کرکٹ کھیلنی پڑتی ہے اور ناکامی کی صورت میں فوراً ٹیم سے باہر کر دیا جاتا ہے۔ یہی وجہ ہے کہ کئی کھلاڑی مڈل آرڈر میں کھیلنے سے ہچکچاتے ہیں۔
حسین طلعت نے کہا کہ ٹیم مینجمنٹ اگر پلیئرز کو مکمل اعتماد دے تو وہ بہتر کھیل پیش کرتے ہیں۔ انہوں نے کہا کہ بھارت سے شکست کے بعد کھلاڑیوں میں غصہ اور جذبہ دونوں تھا اسی عزم کے ساتھ ٹیم سری لنکا کے خلاف میدان میں اتری اور فتح حاصل کی۔
انہوں نے کہا کہ اگر پاکستان ٹیم بنگلا دیش کو شکست دے کر فائنل میں پہنچتی ہے تو بھارت کے خلاف میچ کے لیے کھلاڑی بھرپور تیاری اور جوش کے ساتھ میدان میں اتریں گے۔