حکومت پنجاب نے گندم اور آٹے کی بلا تعطل فراہمی یقینی بنانے کے لیے اہم اقدام اٹھاتے ہوئے فیڈ ملز کو گندم کے استعمال سے روک دیا ہے۔ اس سلسلے میں صوبے بھر میں دفعہ 144 نافذ کر دی گئی ہے۔
محکمہ خوراک پنجاب کے مطابق یہ فیصلہ اس لیے کیا گیا ہے تاکہ صوبے میں گندم، آٹے اور روٹی کی فراہمی میں کسی قسم کا بحران پیدا نہ ہو۔ اعلامیے کے مطابق اب گندم صرف فلور ملز میں آٹا تیار کرنے کے لیے استعمال کی جا سکے گی جبکہ فیڈ ملز میں گندم کے استعمال پر مکمل پابندی عائد کر دی گئی ہے۔
ذرائع کے مطابق پابندی 30 روز کے لیے نافذ کی گئی ہے اور ضلعی انتظامیہ کو ہدایت کی گئی ہے کہ احکامات کی خلاف ورزی کرنے والوں کے خلاف سخت کارروائی عمل میں لائی جائے۔
ترجمان حکومت پنجاب کا کہنا ہے کہ عوام کو سستا اور وافر آٹا فراہم کرنا حکومت کی اولین ترجیح ہے کسی کو بھی انسانی خوراک کے لیے مخصوص گندم کو مویشیوں کی فیڈ میں استعمال کرنے کی اجازت نہیں دی جائے گی۔
محکمہ خوراک اور ضلعی انتظامیہ نے گندم کی غیر قانونی خرید و فروخت اور ذخیرہ اندوزی کے خلاف مانیٹرنگ بھی مزید سخت کر دی ہے تاکہ شہریوں کو آٹے کی فراہمی میں کوئی رکاوٹ پیش نہ آئے۔