ایلس ویلز 4 روزہ دورہ پر پاکستان آئیں گی

بول نیوز  |  Jan 11, 2020

امریکہ کی معاون نائب وزیر خارجہ ایلس ویلز 19 جنوری کو 4 روزہ دورہ پر پاکستان پہنچیں گی۔

ذرائع کے مطابق امریکی پرنسپل ڈپٹی اسسٹنٹ سیکریٹری ایلس ویلز 4 روزہ دورے پر 19 جنوری کو نئی دلی سے اسلام آباد پہنچیں گی۔

 ذرائع کا کہنا ہے کہ امریکہ کی معاون نائب وزیر خارجہ ایلس ویلز اپنے دورے میں وزیر خارجہ,  وزیر اعظم, اور مسلح افواج کے سربراہ سمیت دیگر سیاسی حکام سے ملاقاتیں کریں گی۔

دفتر خارجہ اور امریکی سفارت خانے کے حکام نور خان ائیربیس پر ایلس ویلز اور ان کے وفد کا استقبال کریں گے۔

ایلس ویلز 19 جنوری سے 22 جنوری تک پاکستان میں چار روز قیام کریں گی, جس کے دوران وہ سینئر حکومتی حکام اور سول سوسائٹی کے نمائندگان سے ملاقاتیں کریں گی۔

ذرائع کے مطابق ایلس ویلز پاکستان پہنچنے پر دفتر خارجہ میں وزیر خارجہ شاہ محمود قریشی سے ملاقات کریں گی، ان کی وزیراعظم عمران خان اور مسلح افواج کے سربراہ قمر جاوید باجوہ سے بھی ملاقاتیں متوقع ہیں۔

ان ملاقاتوں میں باہمی اور علاقائی تحفظات, پاک امریکہ تعلقات میں بہتری, پاک امریکہ باہمی ورکنگ گروپس کی کارکردگی، افغانستان میں قیام امن و مفاہمتی عمل پر بات چیت کی جائے گی۔

امریکی پرنسپل ڈپٹی اسسٹنٹ سیکریٹری حالیہ ایران امریکہ کشیدگی کے حوالے سے بھی پاکستانی حکام سے بات چیت کریں گی۔

ایلس ویلز کی جانب سے امریکہ کی پاکستان کو فوجی امداد و فوجی تعلیم و تربیت  کے معاملات بھی زیر غور آنے کا امکان ہے, امریکہ کی پرنسپل ڈپٹی اسسٹنٹ سیکریٹری ایلس ویلز پاکستان آمد سے قبل سری لنکا اور بھارت کا دورہ بھی کریں گی۔

مزید خبریں

Disclaimer: Urduwire.com is only the source of Urdu Meta News (type of Google News) and display news on “as it is” based from leading Urdu news web based sources. If you are a general user or webmaster, and want to know how it works? Read More