’پاکستانی کینیڈین مردم شماری فارم میں پاکستانی زبانوں کے نام لکھ سکتے ہیں‘

اردو نیوز  |  Jun 14, 2021

کینیڈا کی حکومت نے پاکستان ہائی کمیشن کو وضاحت کی ہے کہ کینیڈین مردم شماری کے فارم میں کوئی بھی زبان کسی بھی درجے میں تفصیل سے لکھنے کی اجازت ہے۔

پاکستان ہائی کمیشن کینیڈا  کی جانب سے جاری بیان کے مطابق  ہائی کمیشن کے ساتھ خط و کتابت میں کینیڈین حکام نے اس امر کی تصدیق کر دی ہے کہ کینیڈا کی مردم شماری کا فارم  پر کرتے ہوئے پاکستان نژاد کینیڈین شہری پاکستان کی قومی زبان اردو کے ساتھ ساتھ پاکستانی پنجابی، پاکستانی پشتو، پاکستانی پشتو اور پاکستانی سندھی سمیت کوئی بھی زبان کسی بھی درجے میں تفصیل کے ساتھ لکھ سکتے ہیں۔

اس سے قبل پاکستان ہائی کمیشن کینیڈا نے ایک خط کے ذریعے کینیڈین حکام سے پاکستان میں بولی اور لکھی جانے والی شاہ مکھی پنجابی کو انڈیا میں بولی اور لکھی جانے والی گرمکھی پنجابی سے ممتاز کرنے کی درخواست کی تھی۔

پاکستان ہائی کمیشن نے اردو زبان کو انفرادی قومی زبانوں کے خانے میں شامل کرنے کے ساتھ کینیڈین حکام کے ساتھ خط و کتابت میں پاکستان میں بولی جانے والی دیگر زبانوں بشمول بلوچی، پشتو اور سندھی کے حوالے سے بھی وضاحت کی درخواست کی تھی۔

پاکستان ہائی کمیشن کی جانب سے وضاحت طلب کیے جانے کے بعد سٹیٹسٹکس کینیڈا، حکومت کینیڈا نے پاکستان ہائی کمیشن کو تحریری طور پر مطلع کیا ہے کہ کینیڈا کی  مردم شماری کے فارم کو پر کرتے ہوئے پاکستان نژاد کینیڈین شہری کوئی بھی زبان کسی بھی درجے میں تفصیل کے ساتھ بیان کر سکتے ہیں۔  

ہائی کمیشن کے مطابق اس وضاحت کی روشنی میں انہیں مردم شماری کا فارم پر کرتے ہوئے پاکستان کی قومی زبان اردو کے ساتھ ساتھ پاکستانی پنجابی، پاکستانی پشتو،پاکستانی بلوچی اور پاکستانی سندھی سمیت کوئی بھی زبان کسی بھی درجے میں تفصیل کے ساتھ لکھنے کی مکمل اجازت ہے۔

مزید خبریں

Disclaimer: Urduwire.com is only the source of Urdu Meta News (type of Google News) and display news on “as it is” based from leading Urdu news web based sources. If you are a general user or webmaster, and want to know how it works? Read More