انگلینڈ کرکٹ ٹیم کھانا پکانے کے لیے باورچی پاکستان لائے گی: رپورٹ

اردو نیوز  |  Nov 23, 2022

انگلینڈ کی کرکٹ ٹیم نے پاکستان کے دورے کے لیے ایک باورچی کی خدمات حاصل کرلی ہیں جو ٹیسٹ سیریز کے دوران انگلش کھلاڑیوں کو ان کے مطابق مناسب کھانا دینے کی ذمہ داریاں نبھائیں گے۔

کھیلوں کی ویب سائٹ کرک انفو کے مطابق انگلش کرکٹ بورڈ نے پیشہ ور باورچی کی خدمات حاصل کرنے کا فیصلہ کھلاڑیوں اور سٹاف کے حالیہ دورۂ پاکستان کے تجربات کو مدنظر رکھتے ہوئے کیا ہے۔

رپورٹ کے مطابق پاکستان میں ٹی20 سیریز کے دوران کچھ کھلاڑیوں کا پیٹ خراب ہوگیا تھا۔ ٹیم کے ساتھ سفر کرنے والے باورچی کھلاڑیوں کے ذاتی معیار کے مطابق کھانوں کی تیاری کی نہ صرف نگرانی کریں گے بلکہ مینیو بھی ترتیب دیں گے۔

شیڈول کے مطابق انگلش ٹیم یکم سے پانچ دسمبر تک راولپنڈی میں پہلا ٹیسٹ، نو دسمبر سے 13 دسمبر تک ملتان میں دوسرا ٹیسٹ اور 17 سے 21 دسمبر تک کراچی میں تیسرا ٹیسٹ میچ کھیلے گی۔

انگلینڈ کی ٹیم پاکستان رواں سال ستمبر اور اکتوبر میں سات ٹی20 میچوں کی سیریز کھیلنے آئی تھی اور یہ سیریز انگلش ٹیم نے 3-4 سے جیتی تھی۔

اس دورے کے دوران بھی اس وقت کی انگلش ٹیم کے کپتان معین علی نے پاکستانی کھانوں پر تبصرہ کرتے ہوئے کہا تھا کہ ’کھانے کے حوالے سے مجھے لاہور میں تھوڑی مایوسی ہوئی۔ کراچی (کھانے کے اعتبار سے) اچھا تھا۔‘

کرک انفو کے مطابق انگلینڈ کی کرکٹ ٹیم نے دورۂ پاکستان کے لیے سابق انگلش فٹ بال ٹیم کے باورچی عمر میزان کی خدمات حاصل کی ہیں۔

رپورٹ میں مزید کہا گیا ہے کہ دورۂ پاکستان کے لیے انگلینڈ کی ٹیم کے مینیو کا بڑا حصہ پاستا ڈشز پر مشتمل ہوگا۔

مزید خبریں

Disclaimer: Urduwire.com is only the source of Urdu Meta News (type of Google News) and display news on “as it is” based from leading Urdu news web based sources. If you are a general user or webmaster, and want to know how it works? Read More