تارک مہتا کا الٹا چشمہ ۔ ایک ایسا ڈرامہ جس کو دیکھ کر روتا ہوا بھی ہنس پڑے اور اپنی پریشانیوں کو بھول کر ہر کوئی جیٹھا لال کی مشکلات پر افسوس کرنے بیٹھ جاتا ہے۔ جیٹھا لال ایک ایسا کردار جس کو ہر وقت مصیبتوں میں دیکھ کر لاکھوں لوگ ہنستے ہنستے اپنے غم بھول جاتے ہیں۔ اس ڈرامے کو صرف بچے ہی نہیں بلکہ بڑے، بوڑھے ہر عمر کے لوگ خوب پسند کرتے ہیں۔ کیونکہ یہ ایک ایسی سوسائٹی سے تعلق رکھتا ہے جہاں ہر فرد دوسرے کا ساتھ کھڑا رہتا ہے، کبھی بھی کوئی کسی کو اکیلا نہیں چھوڑتا اور سب کے ساتھ مل کر بڑی سے بڑی مشکل آسان ہو جاتی ہے۔ جیٹھا لال کا اصل زندگی میں نام دلیپ جوشی ہے۔ یہ گُجراتی اداکار ہیں جو بھارت کی کئی بڑی فلموں میں کام کرچکے اور نہ جانے کتنے ہی چھوٹے بڑے سٹیج ڈراموں میں اپنی اداکاری کے جوہر دکھا چکے ہیں۔
دلیپ جوشی نے اپنی زندگی کی مشکلات بتاتے ہوئے ماضی کے انٹرویو میں کہا کہ جب مجھے یہ ڈرامہ ملا اس سے ایک سال قبل تک میں نوکری کی تلاش میں تھا کہ مجھے کوئی کام مل جائے لیکن جو کردار میں کر رہا تھا وہ ڈرامہ بند ہوگیا تھا اور کئی جگہ مجھے کام نہیں دیا جا رہا تھا ، ایسا بھی وقت آیا کہ میں صرف اور صرف 50 روپے میں کردار کر رہا تھا اور اتنی محنت پر صرف 50 روپے لیتا تھا لیکن پھر یہ ڈرامہ مجھے آفر ہوا اور یہاں سے مجھے خُدا نے کامیابی کا راستہ دکھایا۔
جیٹھا لال یا پھر چمپک لال ان دونوں میں سے کوئی ایک کردار کرنے کو کہا گیا تو مجھے لگا کہ میں کوئی بھی ٹھیک سے نہیں کرسکوں گا لیکن ڈائریکٹر نے ہمت دلائی کہ میں جو کروں گا وہ ٹھیک کروں گا اور اس کے بعد میں نے اپنی زندگی میں ہار نہ مانی۔ اسی سیریل سے مجھے دنیا بھر میں جانا جانے لگا۔