کبھی کبھی ایسا بھی ہوتا ہے انسان جس کام سے دوسروں کو بچانے کی کوشش کرتا ہے اکثر خود اسی تکلیف کا شکار ہوجاتا ہے۔ شاید یہی قدرت کا نظام ہے اور اس طرح بھی خدا اپنے بندوں کو اپنے ہونے کا یقین دلاتا ہے۔
ایسا ہی کچھ ہوا بھارت سے تعلق رکھنے والے مشہور ماہر امراض قلب 41سالہ گورو گاندھی کے ساتھ جن کی موت دل کے بند ہونے سے ہوئی۔ اہل خانہ کا کہنا ہے کہ ڈاکٹرگورو گاندھی نے منگل کو شام کے وقت سینے میں درد کا بتایا تھا جس کے بعد تیزابیت کا علاج ہوا اور انھیں طبعیت تھوڑی بہتر محسوس ہوئی اور وہ گھر چلے گئے۔
گھر والوں کا کہنا ہے کہ ڈاکٹر گورو گاندھی دو گھنٹے بعد باتھ روم میں بیہوش ہوگئے تھے اور جب انھیں اسپتال لے جایا گیا تو 45 منٹ کے اندر ان کا انتقال ہوگیا تھا۔
ڈاکٹر گورو گاندھی کی شہرت کی وجہ ان کے کیے گئے 16000 آپریشنز ہیں۔ دل کی بیماریوں میں مبتلا 16000 افراد کی جانیں بچانے والا خود کو نہ بچا سکا اور اچانک دل بند ہونے سے انتقال کرگیا۔ ڈاکٹر گورو گاندھی کو جاننے والے افراد اس وقت سخت افسوس کا اظہار کررہے ہیں۔