پیرس: یورپی یونین نے ایلون مسک کی زیر ملکیت سوشل میڈیا پلیٹ فارم ایکس پر آن لائن مواد سے متعلق قوانین کی خلاف ورزی کا الزام عائد کر دیا۔
غیر ملکی خبر رساں ایجنسی کے مطابق یورپی کمیشن کی جانب سے جاری بیان میں کہا گیا کہ ایکس کے ویریفائیڈ بلیو ٹک اکاؤنٹس کو صارفین کو دھوکہ دینے کے لیے استعمال کیا جا سکتا ہے۔
یورپی ریگولیٹرز کی جانب سے بتایا گیا کہ صارفین کو یہ دھوکہ ہو سکتا ہے کہ ایکس پر بلیو ٹک والا اکاؤنٹ مستند ہے، جبکہ حقیقت یہ ہے کہ ہر فرد پیسے دے کر اپنا اکاؤنٹ ویریفائیڈ کرا سکتا ہے۔
بیان کے مطابق ایسے شواہد دریافت ہوئے ہیں جن سے عندیہ ملتا ہے کہ کچھ افراد کی جانب سے اس سسٹم کا غلط استعمال کیا جا رہا ہے۔
یورپی کمیشن نے یہ بھی دریافت کیا کہ ایکس میں اشتہارات کے حوالے سے شفافیت کی کمی ہے جبکہ سوشل میڈیا پلیٹ فارم نے یورپی قوانین کے تحت درکار ڈیٹا فراہم نہیں کیا۔
خیال رہے اگر یہ الزامات درست ثابت ہو جاتے ہیں تو یورپی یونین کی جانب سے ایکس پر عالمی سالانہ آمدنی کے 6 فیصد حصے کے برابر جرمانہ عائد کیا جا سکتا ہے۔
یہ بھی پڑھیں: چین نے 6 جی کمیونیکیشن کیلئے دنیا کا پہلا فیلڈ ٹیسٹ نیٹ ورک تیار کر لیا
الزامات درست ثابت ہونے پر یورپ میں ایکس کو مختلف تبدیلیوں کے لیے بھی مجبور کیا جا سکتا ہے۔ ایکس کی جانب سے فی الحال اس حوالے سے ابھی تک کوئی بیان جاری نہیں کیا گیا۔
واضح رہے یورپی ریگولیٹرز کی جانب سے ڈیجیٹیل سروسز ایکٹ (ڈی ایس اے) کے تحت 7 ماہ سے مختلف ٹیکنالوجی کمپنیوں کے خلاف تحقیقات کی جا رہی ہیں تاکہ غیر قانونی مواد کی روک تھام ہوسکے اور عوام کا تحفظ ہوسکے۔ ڈی ایس اے کے تحت ٹک ٹاک، میٹا پلیٹ فارمز، ایپل اور دیگر کے خلاف تحقیقات کی جا رہی ہے۔