پاکستان کرکٹ بورڈ نے قومی کھلاڑیوں کو غیر ملکی لیگز میں شرکت کے لیے جاری کیے گئے تمام این او سی تاحکمِ ثانی معطل کر دیے ہیں۔
پی سی بی کے چیف آپریٹنگ آفیسر سمیر احمد کی جانب سے باضابطہ نوٹیفکیشن جاری کیا گیا ہے جس میں کہا گیا ہے کہ کھلاڑیوں کو جاری کردہ غیر ملکی لیگز اور بیرونِ ملک ٹورنامنٹس کے تمام این او سی فی الحال ہولڈ پر رکھے جاتے ہیں۔
این او سی معطلی کا فیصلہ بھارت کے خلاف ایشیا کپ فائنل میں شکست کے ایک روز بعد سامنے آیا ہے۔ پی سی بی کے اس اقدام سے پاکستان کے ٹاپ کرکٹرز بابر اعظم، شاہین آفریدی، محمد رضوان، شاداب خان، حارث رؤف اور فہیم اشرف براہِ راست متاثر ہوں گے۔
واضح رہے کہ پی سی بی نے ان کھلاڑیوں کو آسٹریلیا کی بگ بیش لیگ (BBL) میں شرکت کے لیے این او سی جاری کیے تھے۔ بگ بیش لیگ 14 دسمبر سے شروع ہو کر 25 جنوری تک جاری رہنی ہے تاہم این او سی معطلی کے بعد کھلاڑیوں کی شرکت غیر یقینی ہوگئی ہے۔
پی سی بی نے قومی کھلاڑیوں کو ہدایت دی ہے کہ وہ غیر ملکی لیگز کے بجائے ڈومیسٹک کرکٹ پر توجہ دیں تاکہ قومی سطح پر کارکردگی کو مزید بہتر بنایا جا سکے۔