بلوچستان: بلوچ یکجہتی کمیٹی کے زیرِاہتمام دالبندین میں جلسہ، موبائل فون نیٹ ورک بند

بلوچ یکجہتی کمیٹی کے زیرِاہتمام بلوچستان کے ضلع چاغی کے شہر دالبندین میں جلسہ منعقد کیا گیا جس میں صوبے میں انسانی حقوق کی بڑھتی ہوئی خلاف ورزیوں پر تشویش کا اظہار کرتے ہوئے اسے بند کرنے اور عالمی اداروں سے نوٹس لینے کا مطالبہ کیا گیا۔

مقامی صحافیوں کے مطابق جلسے سے دو روز قبل ہی چاغی اور اس سے متصل خاران اور نوشکی کے اضلاع میں انٹرنیٹ سروس بند کردی گئی تھی جبکہ جلسے کے موقعے پر ضلع بھر میں موبائل فون نیٹ ورک بھی معطل کردی گئی۔جلسے میں چاغی کے علاوہ نوشکی، خاران اور بلوچستان کے دیگر اضلاع سے بھی بڑی تعداد میں افراد نے قافلوں کی شکل میں شرکت کی۔مقامی صحافیوں کے مطابق یہ چاغی کی تاریخ کا سب سے بڑا اجتماع تھا جس میں خواتین کی بڑی تعداد بھی شریک تھی۔بلوچ یکجہتی کمیٹی کی سربراہ ڈاکٹر ماہ رنگ بلوچ سمیت دیگر قائدین نے جلسے سے خطاب کیا۔ ان کا کہنا تھا کہ ’بلوچستان کے معدنی وسائل کی لُوٹ مار کی کسی کو اجازت نہیں دیں گے۔‘ان کا مزید کہنا تھا کہ ’بلوچستان کے عوام کی مرضی و منشاء کے بغیر کوئی بھی میگا پروجیکٹ کامیاب نہیں ہوگا۔‘ڈاکٹر ماہ رنگ بلوچ نے کہا کہ ’بلوچوں کی نسل کشی کی جا رہی ہے۔ مظالم اور ناانصافیوں نے ہی بلوچوں کو آج متحد کیا ہے۔انسانی حقوق کی تنظیمیں بلوچستان میں ہونے والے مظالم کا نوٹس لیں۔‘