موت کا جھوٹا دعویٰ کرنے والے یورپ کے ’موسٹ وانٹڈ‘ ڈرگ سمگلر میکسیکو میں قتل

یورپ کے انتہائی مطلوب منشیات کے سمگلر اور اپنی ہی موت کا جھوٹا دعویٰ کرنے والے 32 سالہ مارکو ایبن کو میکسیکو میں قتل کر دیا گیا ہے۔

خبر رساں ادارے اے ایف پی کے مطابق مارکو ایبن کا تعلق نیدر لینڈز سے تھا اور انہیں دارالحکومت میکسیکو سٹی سے 25 کلو میٹر کی دوری پر واقع ایتزپان زاراگوزہ کی میونسیپلٹی میں گولی مار کر قتل کیا گیا ہے۔

پراسیکیوٹر کے دفتر میں ایک عہدیدار نے منشیات کے سمگلر مارکو ایبن کی موت کی تصدیق کی ہے۔

یورپ کی قانون نافذ کرنے والی ایجنسی یوروپال نے برازیل سے نیدرلینڈز منشیات سمگل کرنے کے جرم میں مارکو ایبن کو یورپ کے ’انتہائی مطلوب مفروروں‘ کی فہرست میں شامل کیا ہوا تھا۔

یوروپال کی ویب سائٹ پر موجود معلومات کے مطابق مارکو ایبن کو اکتوبر 2020 میں سات سال سے زیادہ کی قید کی سزا سنائی گئی تھی۔

ایجنسی کے مطابق مارکو ایبن اور ان کے ساتھیوں نے سال 2014 سے 2015 کے درمیان مبینہ طور پر 400 کلو کی کوکین پائن ایپل کے ڈبوں میں بھر کر سمگل کی تھی۔

گرفتاری سے بچنے کے لیے ڈرگ سمگلر نے گزشتہ سال اکتوبر میں اپنی ہی موت کا ڈرامہ رچایا تھا۔  

مقامی میڈیا پر بھی اس حوالے سے خبر بھی نشر ہوئی تھی کہ میکسیکو میں دو مضبوط ڈرگ مافیاز کے درمیان لڑائی میں مارکو ایبن ہلاک ہو گئے ہیں۔

تاہم اس حوالے سے مارکو ایبن کی سابقہ گرل فرینڈ کے بیان کے علاوہ کوئی شواہد سامنے نہیں آ سکتے تھے جس میں انہوں نے لاش کی شناخت کا دعویٰ کیا تھا۔