آج شام دنیا بھر میں لاکھوں کروڑوں مسلمان رمضان کا چاند دیکھنے کے لیے اپنے چہرے آسمان کی جانب کریں گے۔
مگر چاند کو تلاش کرنے کے ساتھ ساتھ آپ آج نظام شمسی کے تمام سیارے (زمین کو نکال کر) بھی آسمان پر دیکھ سکتے ہیں۔
جی ہاں واقعی سیاروں کی قطار یا پلانیٹ پریڈ کا منفرد نظارہ 28 فروری کی شام کو دیکھنا ممکن ہوگا۔
عطارد، زہرہ، مریخ، مشتری، زحل، یورینس اور نیپچون ان سب سیاروں کی نایاب پریڈ دوبارہ دیکھنے کے لیے 2040 تک انتظار کرنا ہوگا۔
ان سب سیاروں کو آسمان پر دیکھنا ممکن تو ہے مگر چند سیارے آسانی سے نظر نہیں آئیں گے۔
عطارد، نیپچون اور زحل شام کے آغاز پر افق کے بہت زیادہ قریب ہوں گے، خاص طور پر نیپچون اور زحل کو شام کی روشنی میں دیکھنا بہت مشکل ہوگا۔
اسی طرح یورینس کی روشنی بہت مدھم ہوگی اور اسے دیکھنے کے لیے دوربین یا ٹیلی اسکوپ کی ضرورت ہوگی۔
البتہ زہرہ، مریخ اور مشتری کو بہت آسانی سے آپ آسمان پر دیکھ سکیں گے۔
3، 4 یا 5 سیاروں کی پریڈ اکثر دیکھنے میں آتی ہے مگر تمام 7 سیاروں کی پلانیٹ پریڈ کافی نایاب ہے۔
اس سے قبل جون 2024 میں بھی تمام سیاروں کی پلانیٹ پریڈ دیکھنے میں آئی تھی مگر اس موقع پر صرف 2 سیاروں کو آنکھوں سے دیکھنا ممکن تھا۔
6 سیاروں کی پریڈ جنوری 2025 میں ہوئی اور اس موقع پر 4 سیاروں کا نظارہ آنکھوں پر ممکن ہوا تھا۔
اچھی بات یہ ہے کہ پاکستان کے بیشتر شہروں میں آج یہ نظارہ نظر آئے گا مگر اس کا انحصار موسم پر ہوگا۔