امریکہ کے صدر ڈونلڈ ٹرمپ نے اُن خبروں کی تردید کی ہے جن میں کہا گیا تھا کہ سینئیر حکومتی مشیر ایلون مسک اور سیکریٹری خارجہ مارکو روبیو میں کابینہ کے اجلاس میں تلخ کلامی ہوئی ہے۔بین الاقوامی خبر رساں ایجنسیوں اے ایف پی اور روئٹرز کے مطابق جمعرات کو وائٹ ہاؤس میں کابینہ اجلاس کے دوران ایلون مسک نے پہلے مارکو روبیو اور الگ سے سیکریٹری ٹرانسپورٹیشن شان ڈیفی سے بحث کی جبکہ ڈونلڈ ٹرمپ صدارت کر رہے تھے۔ایلون مسک سرکاری محکموں میں اخراجات کو کم کرنے اور ملازمتوں کو ختم کرنے والے ڈیپارٹمنٹ آف گورنمنٹ ایفیشنسی (ڈی او جی ای) کی سربراہی کر رہے ہیں۔مبینہ طور پر متعدد سرکاری محکموں کے سربراہوں اور ایلون مسک کے درمیان تناؤ پیدا ہو رہا ہے۔نیو یارک ٹائمز کی رپورٹ کے مطابق اجلاس میں ایلون مسک نے مارکو روبیو سے کہا کہ وہ صرف ’ٹی وی پر ہی اچھے ہیں‘ اور یہ کہ انہوں نے اپنی وزارت یا محکمہ سے کسی ملازم کو برطرف نہیں کیا سوائے ایک شخص کے جو ڈیپارٹمنٹ آف گورنمنٹ ایفیشنسی کے لیے کام کر رہا تھا۔سیکریٹری خارجہ روبیو نے ایلون مسک پر جوابی وار کرتے ہوئے کہا کہ وہ سچ نہیں بول رہے کیونکہ محکمہ خارجہ کے 1,500 اہلکاروں نے قبل از وقت ریٹائرمنٹ قبول کر لی ہے۔انہوں نے ایلون مسک پر طنز کیا کہ ان ملازمین کو دوبارہ ملازمت سے برطرف کرنے کے لیے مزید شاندار طریقے سے نوکری پر رکھنا چاہیے۔نیو یارک ٹائمز کے مطابق اسی طرح ٹرانپسورٹیشن کے وزیر شان ڈیفی نے ایلون مسک کے محکمے پر تنقید کرتے ہوئے کہا کہ اُس نے فضائی ٹریفک کے اہم کنٹرولرز کو برطرف کرنے کی کوشش کی جبکہ وہ طیاروں کے کئی حادثات سے نبرد آزما تھے۔ اسی دوران ایلون مسک نے اُن پر اس حوالے سے جھوٹ بولنے کا الزام عائد کیا۔صدر ٹرمپ نے مبینہ طور پر اس بحث کو روکنے کے لیے مداخلت کی اور تجویز کیا کہ اب سے میساچیوسیٹس انسٹیٹیوٹ آف ٹیکنالوجی میں زیر تعلیم ’جینیئسز‘ سے ایئر ٹریفک کنٹرولرز کی خدمات حاصل کی جائیں۔صدر ٹرمپ نے کہا کہ ایلون مسک اور مارکو روبیو دونوں اچھا کام کر رہے ہیں۔ فوٹو: اے ایف پیصدر ٹرمپ نے اعلان کیا کہ کٹوتیاں جاری رہیں گی لیکن اب ’کلہاڑی‘ کے بجائے ’چھری‘ کا استعمال کیا جائے گا۔ اس بات سے انہوں نے عندیہ دیا کہ ایلون مسک کو اپنا کام جاری رکھنے دیا جائے گا تاہم اس کا طریقہ بدل دیا جائے گا۔لیکن جب جمعے کو مبینہ تنازعے کے بارے میں پوچھا گیا تو صدر ٹرمپ نے اس کو مسترد کر دیا۔صدر ٹرمپ نے نیو یارک ٹائمز کی رپورٹ کے حوالے سے سوال پر جواب دیا کہ ’کوئی تصادم نہیں ہوا، میں وہاں تھا، آپ صرف ایک پریشانی پیدا کرنے والوں میں سے ہیں۔‘صدر ٹرمپ نے ایلون مسک اور مارکو روبیو کے بارے میں کہا کہ ’وہ دونوں بہت اچھا کام کر رہے ہیں، وہ دونوں بہت اچھے طریقے سے ساتھ ہیں۔‘جب سے صدر ٹرمپ نے دوسری بار اقتدار سنبھالا ہے ہزاروں وفاقی ملازمین کو برطرف یا رخصت کرنے کا اعلان کیا ہے۔