گوگل میپس کا استعمال روزانہ کروڑوں افراد کرتے ہیں اور اس نیوی گیشن سروس میں کافی کچھ ڈھونڈتے بھی ہیں۔
اگر آپ پرہجوم شہر میں گاڑی میں سفر کر رہے ہیں یا کسی جگہ کو ڈھونڈ رہے ہیں تو گوگل میپس سے کافی مدد ملتی ہے۔ مگر اس سروس میں ایسے فیچرز بھی موجود ہیں جو بہترین ہوتے ہیں مگر ان کے بارے میں اکثر افراد کو علم نہیں ہوتا۔
ان میں سے ایک فیچر گوگل اسٹریٹ ویو میں چھپا تاریخی مقامات کی تصاویر کا ہے۔ گوگل میپس میں مختلف برسوں میں مقامات میں آنے والی تبدیلوں کو دیکھنا بہت آسان ہوتا ہے، اب آپ اسے ڈیسک ٹاپ کمپیوٹر میں استعمال کریں یا موبائل پر۔
آپ گوگل اسٹریٹ ویو میں جاکر دیکھ سکتے ہیں کہ کچھ مقامات 2007 میں کیسے نظر آتے تھے اور اب وہ کس حد تک بدل چکے ہیں۔ اگر آپ ڈیسک ٹاپ کمپیوٹر پر گوگل میپس کو استعمال کر رہے ہیں تو میپ پر کسی بھی اس جگہ پر کلک کریں جہاں اسٹریٹ ویو دستیاب ہو۔
اس کے بعد اسٹریٹ ویو پینل پر کلک کریں جو نیچے موجود ہوگا۔ اسی طرح آپ کسی مخصوص جگہ جیسے پارک یا ہوٹل کو سلیکٹ کریں گے تو ان کے بارے میں تفصیلات انفو پینل میں نمودار ہو جائی گی۔
اس کے بعد آپ اسٹریٹ پینل یا اسٹریٹ اینڈ 360 پر کلک کریں جس کے بعد فوٹو گیلری نظر آنے لگے گی۔ اگر اس مقام کی پرانی تصاویر دستیاب ہوں گی تو آپ کو سی مور ڈیٹس لنک اوپر بائیں جانب نظر آئے گا اور اس پر کلک کرکے آپ تمام دستیاب تاریخوں کو دیکھ سکتے ہیں۔
اگر آپ گوگل میپس کو اینڈرائیڈ فون یا آئی فون میں استعمال کر رہے ہیں تو اسٹریٹ ویو کو استعمال کرنے کے 2 آپشن دستیاب ہوں گے۔ آپ میپ میں کسی مقام کو دبا کر رکھیں، اگر اسٹریٹ ویو تصایر دستیاب ہوں گی تو نیچے بائیں کونے میں تصاویر نمودار ہو جائیں گی۔
اسی طرح آپ کسی لیبل پلیس نام کو دبا کر رکھیں اور پھر فوٹوز اور پھر اسٹریٹ ویو اینڈ 360 کا انتخاب کریں۔ اگر وہاں پرانی تاریخوں کا ڈیٹا دستیاب ہوگا تو سی مور ڈیٹس کا آپشن آپ نیچے اسکرین پر دیکھ سکیں گے جس پر کلک کرکے آپ پرانی تاریخوں میں جاسکتے ہیں۔
آپ گوگل ارتھ کو استعمال کرکے تاریخی سیٹلائیٹ تصاویر کو بھی دیکھ سکتے ہیں۔ ڈیسک ٹاپ کمپیوٹر میں آپ ٹول بار پر Activate historical imagery بٹن پر کلک کریں جبکہ موبائل ایپس میں historical imagery آپشن کا انتخاب کریں۔
سیٹلائیٹ تصاویر میں آپ دنیا کے کچھ حصوں کی 1970 کی دہائی کی تصاویر کو بھی دیکھ سکتے ہیں۔