وزیرِ اعلیٰ پنجاب مریم نواز شریف نے سیلاب زدگان کے لیے ریلیف پیکج کا اعلان کرتے ہوئے کہا ہے کہ متاثرہ خاندانوں کو براہِ راست ریلیف فراہم کرنے کے لیے خصوصی کارڈ جاری کیے جائیں گے۔
وزیرِ اعلیٰ نے بتایا کہ اگر کسی کا پورا مکان گر جائے تو متاثرہ خاندان کو 10 لاکھ روپے دیے جائیں گے۔ اگر مکان آدھا متاثر ہو تو معاوضے کے طور پر 5 لاکھ روپے فراہم کیے جائیں گے جبکہ مویشیوں کے نقصان کی صورت میں بھی متاثرہ خاندان کو 5 لاکھ روپے تک امداد ملے گی۔
کسانوں کے لیے بھی بڑے پیکج کا اعلان کرتے ہوئے وزیرِ اعلیٰ نے کہا کہ جن کسانوں کی زمینیں سیلاب سے متاثر ہوئی ہیں، انہیں 12 ایکڑ تک فی ایکڑ 20 ہزار روپے امداد دی جائے گی۔
مریم نواز نے کہا کہ حکومت مشکل وقت میں عوام کو تنہا نہیں چھوڑے گی اور تمام وسائل متاثرین کی بحالی کے لیے بروئے کار لائے جائیں گے۔ انہوں نے متعلقہ محکموں کو ہدایت کی کہ امدادی رقوم اور سہولیات کی فراہمی میں شفافیت کو یقینی بنایا جائے تاکہ حقیقی مستحقین تک مدد پہنچ سکے۔