باجوڑ کی تحصیل لوئی ماموند کے علاقے لغڑئی ماموند میں مبینہ طور پر گولہ گرنے کے حادثے میں جاں بحق 4 بچوں کو سپرد خاک کردیا گیا۔ واقعہ میں 5 افراد زخمی بھی ہوئے تھے۔
چاروں بچوں کی اجتماعی نماز جنازہ امیر جماعت اسلامی صاحبزادہ ہارون رشید نے پڑھائی، واقعہ ہفتہ کے روز باجوڑ لغڑئی ماموند میں پیش آیا تھا جس میں چار بچے جاں بحق ہوئے، جاں بحق ہونے والوں میں 18 سالہ فواد ولد دلبر، 10 سالہ جواد ولد یوسف، 10 سالہ سجاد ولد مجید اور 18 سالہ نوشاد شامل ہیں۔
لغڑئی ماموند واقعہ کے چار جاں بحق بچوں کو اشکبار آنکھوں کے ساتھ سپرد خاک کردیا گیا، لغڑئی ماموند واقعہ کے جنازے کے موقع پر رقت آمیز مناظر دیکھنے میں آئے جبکہ علاقے میں سوگ کا سماں رہا۔