پشاور میں شہریوں کی عدم دلچسپی کے باعث مرغی کی قیمت کم ہو کر دال سے بھی نیچے آگئی۔
مارکیٹ ذرائع کے مطابق پشاور میں زندہ مرغی کی فی کلو قیمت 340 روپے تک گر گئی ہے جو گزشتہ ایک سال میں سب سے کم سطح ہے۔ گزشتہ برس ستمبر سے اب تک مرغی کی فی کلو قیمت 400 سے 550 روپے کے درمیان رہی تاہم مسلسل کمی کے بعد یہ ریکارڈ سطح پر پہنچ گئی ہے۔
اس کے برعکس شہر کی مارکیٹوں میں دالوں کی قیمتیں 350 روپے سے 500 روپے فی کلو تک جا پہنچی ہیں جن میں ماش، مسور، چنا اور دیگر دالیں شامل ہیں۔
تاجروں کا کہنا ہے کہ شہریوں کی مرغی کے گوشت میں عدم دلچسپی کے باعث قیمتیں نیچے آئی ہی تاہم سردی کے آغاز اور شادیوں کے سیزن میں طلب بڑھنے سے قیمتوں میں دوبارہ اضافہ متوقع ہے۔