سندھ کے ضلع شکارپور میں سلطان کوٹ کے قریب سومرواہ کے مقام پر ریلوے ٹریک پر دھماکا ہوا جس کے نتیجے میں جعفر ایکسپریس کی پانچ بوگیاں پٹڑی سے اتر گئیں اور چار مسافر زخمی ہوگئے۔
جعفر ایکسپریس پشاور سے کوئٹہ جا رہی تھی جب اچانک دھماکا ہوا۔ زخمیوں کو فوری طور پر قریبی اسپتال منتقل کردیا گیا ہے جبکہ جائے وقوع پر ریسکیو آپریشن جاری ہے۔
سیکیورٹی اداروں کے مطابق دھماکے کے باعث ٹریک کو نقصان پہنچا ہے۔ پولیس اور رینجرز کی بھاری نفری نے علاقے کو گھیرے میں لے کر شواہد اکٹھے کرنا شروع کر دیے ہیں جب کہ دھماکے کی نوعیت معلوم کرنے کے لیے تحقیقات جاری ہیں۔
ترجمان پاکستان ریلویز کے مطابق ریسکیو ٹیمیں جائے وقوع پر روانہ کر دی گئی ہیں تاکہ متاثرہ ٹریک کی بحالی اور زخمیوں کی مدد کے لیے فوری اقدامات کیے جا سکیں۔