ن لیگ: شہزاد اکبر اور ڈی جی نیب کے خلاف مقدمہ درج کرنیکی درخواست

ہم نیوز  |  Aug 12, 2020

لاہور: پاکستان مسلم لیگ (ن) کی جانب سے مریم نواز کی نیب میں پیشی کے موقع پر ہونے والی ہنگامہ آرائی کے خلاف مقدمہ درج کرنے کی درخواست دے دی گئی ہے۔

ہم نیوز کے مطابق مریم نواز کے خاوند اور ن لیگی رہنما کیپٹن (ر) صفدر کی جانب سے درخواست تھانہ چوہنگ میں جمع کرائی گئی ہے۔

ذرائع کے مطابق ن لیگ کی جانب سے دی جانے والی درخواست میں وزیراعظم عمران خان کے مشیر برائے احتساب و داخلہ امور شہزاد اکبر اور ڈی جی نیب سمیت 100 دیگر نامعلوم افراد کو نامزد کیا گیا ہے۔

ہم نیوز کے مطابق تھانہ چوہنگ میں دی جانے والی درخواست میں مؤقف اختیار کیا گیا ہے کہ مریم نواز کو وزیراعظم عمران خان اور شہزاد اکبر کی ایما پر نیب نے طلب کیا تھا۔

پاکستان مسلم لیگ (ن) کے قائد میاں نواز شریف کے داماد کیپٹن (ر) صفدر کی جانب سے دی جانے والی درخواست میں کہا گیا ہے کہ مریم نواز کے نیب دفتر پہنچنے پر 100 باوردی افراد نے اچانک حملہ کردیا۔

ہم نیوز کے مطابق درخواست میں درج ہے کہ ن لیگی کارکنان پر کیمیکل و آنسو گیس کے شیل پھینکے گئے اور ان کے خلاف واٹر کینن کا استعمال کیا گیا۔

درخواست میں مؤقف اختیار کیا گیا ہے کہ ن لیگی کارکنان کو تشدد کا نشانہ بنایا گیا اور انہیں ناحق گرفتار کیا گیا۔

مریم نواز کے خاوند کی جانب سے دی جانے والی درخواست میں کہا گیا ہے کہ نامزد افراد کے خلاف مقدمہ درج کیا جائے۔

نیب کے باہر پیش آنیوالے واقع کے ذمہ داروں کو سامنے لانا چاہئیے،شاہ محمود

ہم نیوز نے کچھ دیر قبل بتایا تھا کہ نیب کی جانب سے دی جانے والی درخواستوں پر تھانہ چوہنگ میں مریم نواز اور دیگر اہم سیاسی شخصیات کے خلاف مقدمہ درج کیا جار ہا ہے۔

مزید خبریں

Disclaimer: Urduwire.com is only the source of Urdu Meta News (type of Google News) and display news on “as it is” based from leading Urdu news web based sources. If you are a general user or webmaster, and want to know how it works? Read More